اقتاۋ ماڭىندا اپاتقا ۇشىراعان ازەربايجان ۇشاعىنا قاتىستى جاڭا دەرەكتەر تارادى، - دەپ حابارلايدى Dalanews.kz. 

ۆچك-وگپۋ تەلەگرام ارناسىنىڭ مالىمەتىنشە، ازەربايجاننان گروزنىيعا ۇشقان ۇشاق  شەشەنستاننىڭ ناۋر اۋدانىنىڭ ۇستىندە اۋە شابۋىلىنا قارسى قورعانىس (ءاشقق) قۇرالدارىنىڭ سوققىسىنا ۇشىراعان. سول ۋاقىتتا ءدال وسى اۋداندا ەكى درونعا قارسى وق اتىلعان.

"وقيعادان ەكى اپتا بۇرىن گروزنىي اۋەجايى اۋماعىنا ەكى "پانسير" زىمىراندىق كەشەنى ورناتىلعان بولاتىن. بيلىك وقيعانىڭ ءمان-جايىن بىردەن تۇسىنگەنگە ۇقسايدى، ويتكەنى ۇشاققا سوققى تيگەننەن كەيىن ءبىر مينۋت وتپەي-اق "كوۆەر" رەجيمى جاريالانعان.

سونىمەن قاتار، تراگەديا كەزىندە ۇشاقتى باسقارعان ديسپەچەر الي يدريسوۆ بولعان، ول رامزان قادىروۆتىڭ سۇيىكتى كلۋبى "تەرەك" (قازىرگى "احمات") كومانداسىنىڭ بۇرىنعى ويىنشىسى. 29 جەلتوقساندا كەشكى ۋاقىتتا ونى تەرگەۋ امالدارى جۇرگىزىلگەن. 

يدريسوۆ اۋە قورعانىسى جۇيەسىنىڭ جۇمىس ىستەپ تۇرعانىن بىلمەگەنىن، ال "كوۆەر" رەجيمى تۋرالى اقپاراتتى وقيعادان بەس مينۋت وتكەن سوڭ عانا العانىن مالىمدەدى.

"29 جەلتوقساندا كەش بويى رەسەيدىڭ تەرگەۋ كوميتەتىنىڭ تەرگەۋشىلەرى گروزنىيداعى اۋە قوزعالىسىن ۇيىمداستىرۋ جونىندەگى مەملەكەتتىك كورپوراسيانىڭ جەرگىلىكتى فيليالىنىڭ قىزمەتكەرلەرىن تەرگەدى. اۋە وقيعاسىنا قاتىستى كۋاگەر رەتىندە جاۋاپ بەرگەن ديسپەچەر الي يدريسوۆ "باكۋ-گروزنىي" رەيسىن قوندىرۋدى ۇيىمداستىرعان.

قىزىق دەرەك: الي يدريسوۆ ديسپەچەر بولماس بۇرىن كاسىبي فۋتبولشى بولعان جانە گروزنىيدىڭ "تەرەك" (قازىرگى "احمات") كومانداسىندا ويناعان. 2016 جىلى فۋتبول مانسابىن اياقتاعان سوڭ، ول قۇرىلىسشىلاردىڭ ءوڭىرارالىق بىرلەستىگىنە زاڭگەر بولىپ جۇمىسقا ورنالاسقان. بىرنەشە جىل وتكەن سوڭ، 33 جاستاعى الي يدريسوۆ ديسپەچەر قىزمەتىنە كىرىستى"، - دەلىنگەن تەلەگرامداعى جازبادا. 

ۆچك-وگپۋ مالىمەتىنشە، يدريسوۆ بۇل وقيعانى ەكيپاجدىڭ حابارلاماسىنا سۇيەنە وتىرىپ، سوڭىنا دەيىن قۇستارمەن سوقتىعىسۋ سالدارىنان بولعان دەپ ويلاعان.