اقتاۋ قالاسىنىڭ پروكۋراتۋراسى مۇناي وڭدەۋمەن اينالىساتىن “Mangystau OilRefining” جشس-دە جالاقى تولەۋ ءتارتىبىنىڭ زاڭعا سايكەستىگىن تەكسەردى، دەپ حابارلايدى Dalanews.kz.
ماڭعىستاۋ وبلىسى پروكۋراتۋراسىنىڭ مالىمەتىنشە، قاڭتاردان ناۋرىزعا دەيىن اتالعان كاسىپورىندا 241 جۇمىسشى ەڭبەكاقىسىن الا الماعان. جالپى بەرەشەك سوماسى — 197 ميلليون تەڭگەنى قۇراعان.
"پروكۋرورلىق قاداعالاۋ ناتيجەسىندە قىزمەتكەرلەردىڭ كونستيتۋسيالىق قۇقىقتارى قورعالىپ، جالاقى تولىعىمەن تولەندى"، – دەلىنگەن رەسمي حابارلامادا.
وسىعان بايلانىستى ەڭبەكاقى تولەۋدە ولقىلىققا جول بەرگەن كومپانيا باسشىلىعى اكىمشىلىك جاۋاپكەرشىلىككە تارتىلدى.
ايتا كەتەيىك، بۇعان دەيىن تاراز قالاسىنىڭ پروكۋراتۋراسى دا ەڭبەك جانە زەينەتاقى زاڭناماسىنىڭ بۇزىلعانىن انىقتاعان بولاتىن. “جاسىل ەل تاراز” ج ش س قالا اۋماعىن تازالاۋ جانە اباتتاندىرۋمەن اينالىسا وتىرىپ، جىل باسىنان بەرى 605 قىزمەتكەردىڭ زەينەتاقى جارنالارىن اۋدارماعان. جينالعان بەرەشەك 24 ميلليون تەڭگەنى قۇرادى. بۇل ارەكەت 742 ازاماتتىڭ قۇقىعىنىڭ بۇزىلۋىنا الىپ كەلگەن.
