«تازا قازاقستان» ەكواكسياسى اياسىندا اباي وبلىسىنىڭ اقسۋات اۋدانى تۇرعىندارى كوشەلەردى تازالاپ، قابانباي باتىر ەسكەرتكىشىنىڭ اۋماعىن تازارتتى، – دەپ حابارلايدى Dalanews.kz اباي وبلىسى اكىمىنىڭ باسپا ءسوز قىزمەتىنە سىلتەمە جاساپ.
ەكولوگيالىق مادەنيەتتى قالىپتاستىرۋ، حالىقتىڭ تابيعاتقا ۇقىپتى قاراۋى ماقساتىندا قابانباي باتىر ەسكەرتكىشى تۇرعان ساياباقتى اباتتاندىرۋ جۇمىستارى جۇرگىزىلۋدە. ەسكەرتكىشتەردى قالپىنا كەلتىرۋ، جۋۋ، ءشوپ شابۋ، قالدىقتاردى جيناۋ، سونداي-اق تاريحي-مادەني نىساندارعا ىرگەلەس اۋماقتى تازارتۋ ۇيىمداستىرىلدى.
اكسيا بارىسىندا 686-دەن استام ازامات، بەلسەندىلەر مەن ەرىكتىلەر بىرلەسكەن كۇش-جىگەرمەن 256 000 شارشى مەترگە جۋىق تازارتىلدى.
بۇدان باسقا، ساتبايەۆ اۋىلىندا ۇزىندىعى 1،4 شاقىرىم جولدى ورتاشا جوندەۋ جوسپارلانعان.
ساتبايەۆ اۋىلىنىڭ تۇرعىنى باعلان قابىشيەۆ اتاپ وتكەندەي، بارلىق اۋىل تۇرعىندارى جولدى جوندەلگەنىنە قۋانىشتى.
– جول ۇزاق ۋاقىت بويى جوندەۋدى قاجەت ەتتى. سوندىقتان جوندەۋ باستالاتىنى تۋرالى حاباردى ءبارىمىز قۋانىشپەن قارسى الدىق. الداعى ۋاقىتتا جول جوندەۋ جۇمىستارى جالعاسادى جانە ءبىزدىڭ اۋىلعا اپاراتىن جول تەگىس بولادى دەپ ۇمىتتەنەمىز، – دەدى باعلان قابىشيەۆ.
اقسۋات اۋدانىنىڭ «Amanat» پارتياسى فيليالىنىڭ ءتوراعاسى ەرجان قۇتتىبايەۆ جولداردى جوندەۋ، سونداي-اق ەلدى مەكەندەردى تارتىپكە كەلتىرۋ پارتيا باعدارلاماسىن ۇدەمەلى ىسكە اسىرۋ ەكەنىن اتاپ ءوتتى.
– ساتبايەۆ اۋىلىنا دەيىنگى جولدى جوندەۋدىڭ ارقاسىندا ەندى حالىققا جەكە كولىكپەن عانا ەمەس، ارنايى ماشينالارمەن دە جەتۋ وڭاي بولادى. سونىمەن قاتار، اۋدان حالقىنىڭ بارلىعى دەرلىك «تازا قازاقستان» ەكولوگيالىق اكسياسىن قولدادى. بۇل ءبارىمىز ءۇشىن دە وتە ماڭىزدى، ويتكەنى بۇل ءبىزدىڭ كوشەلەرىمىزدى ۇقىپتى ەتىپ قانا قويماي، ءبارىمىزدى بىرىكتىرەدى، – دەپ اتاپ ءوتتى ەرجان قۇتتىبايەۆ.
