اقش پرەزيدەنتى دونالد ترامپ ەلگە كەلەتىن شەتەلدىكتەرگە قاتىستى جاڭا تالاپ ەنگىزۋدى جوسپارلاپ وتىر. فەدەرالدىق تىزىلىمدە جاريالانعان جوباعا سايكەس، اقش-قا كىرەتىن بارلىق تۋريستەن كەيىنگى بەس جىلداعى الەۋمەتتىك جەلى پاراقشالارىنىڭ تاريحىن سۇراتۋ قاراستىرىلعان، دەپ حابارلايدى Dalanews.kz.
بۇل شارا شەتەلدىك مەيمانداردى باقىلاۋدى كۇشەيتۋدى كوزدەيدى جانە ەلگە كەلەتىن ادامدار تۋرالى مالىمەتتەردى تەكسەرۋ مۇمكىندىگىن كەڭەيتپەك.
كىمدەرگە قاتىستى؟
اقش-تىڭ كەدەن جانە شەكارا قىزمەتىنىڭ مالىمەتىنشە، بۇل تالاپ ەلگە كىرەتىن بارلىق شەتەلدىككە قولدانىلادى. ءتىپتى ۆيزا الماي-اق كەلە الاتىن ازاماتتار دا تەكسەرۋدەن وتەدى. اسىرەسە ۇلىبريتانيا مەن گەرمانيا تۇرعىندارى، ولار ءداستۇرلى ۆيزانىڭ ورنىنا ەلەكتروندى رۇقسات جۇيەسىن (ESTA) پايدالانىپ ءجۇر.
وسىلايشا، قىسقا مەرزىمدى ساياحاتشىلار، ىسساپارمەن كەلەتىندەر نەمەسە كونفەرەنسياعا قاتىسۋشىلار دا اقش بيلىگىنىڭ ەرەكشە نازارىندا بولادى.
قانداي مالىمەتتەر سۇرالۋى مۇمكىن؟
الەۋمەتتىك جەلىدەگى جازبالار مەن بەلسەندىلىكتەن بولەك، بيلىك مىنا اقپاراتتاردى جيناۋدى جوسپارلاپ وتىر:
- كەيىنگى بەس جىلدا پايدالانىلعان ەلەكتروندى پوشتالار؛
- وسى كەزەڭدە قولدانىلعان تەلەفون نومىرلەرى؛
- وتباسى مۇشەلەرى مەن جاقىن تۋىستارى تۋرالى دەرەك.
ياعني بۇل وزگەرىس ءداستۇرلى يمميگراسيالىق تەكسەرۋلەردى شەتەلدىكتىڭ تولىق سيفرلىق ءومىربايانى دەڭگەيىنە دەيىن كەڭەيتەدى.
مۇمكىن سالدارى
ساراپشىلاردىڭ ايتۋىنشا، مۇنداي قادام جەكە ومىرگە قول سۇعۋ جانە ەركىن ءجۇرىپ-تۇرۋ قۇقىقتارى جونىندە ۇلكەن پىكىرتالاس تۋدىرۋى مۇمكىن. بۇرىن جەڭىلدەتىلگەن تارتىپپەن ساياحاتتاپ ۇيرەنگەن تۋريستەر ەندى وزدەرىنىڭ سيفرلىق ومىرىنە قاتىستى كوپ اقپاراتتى اشۋعا ءماجبۇر بولادى.
سونىمەن بىرگە جينالعان مالىمەتتەردىڭ قالاي قولدانىلاتىنى جانە ولاردى ساقتاۋ قاۋىپسىزدىگى دە اشىق كۇيىندە قالىپ وتىر.
