اقش-تىڭ قازاقستانداعى ەلشىسى بولۋعا ۇمىتكەر دجۋلي ستاففت استاناعا ماسكەۋ مەن بەيجىڭ ىقپالىنا قارسى تۇرۋعا كومەكتەسۋگە ۋادە بەردى، دەپ حابارلايدى Dalanews.kz.

اقش سەناتىنىڭ حالىقارالىق ىستەر جونىندەگى كوميتەتىندە وتكەن تىڭداۋلاردا قازاقستانداعى امەريكالىق ەلشى قىزمەتىنە ۇمىتكەر دجۋلي ستاففت ءوز باعدارلاماسىن تانىستىردى. ول تاعايىندالعان جاعدايدا ۆاشينگتون مەن استانا اراسىنداعى ەكونوميكالىق بايلانىستاردى نىعايتۋعا، سونداي-اق رەسەي مەن قىتايدىڭ قازاقستانداعى ىقپالىنا قارسى ارەكەت ەتۋگە نيەتتى ەكەنىن مالىمدەدى.

ءستاففتتىڭ ايتۋىنشا، اقش قازاقستاننىڭ تاۋەلسىزدىگىن العاش بولىپ مويىنداعان ەل رەتىندە 1991 جىلدان بەرى ەل ۇكىمەتى مەن حالقىنا قولداۋ كورسەتىپ كەلەدى.

«ءبىز قازاقستاننىڭ يادرولىق جانە بيولوگيالىق كەڭەستىك قارۋىنان ارىلۋىنا كومەكتەستىك. كەيىن امەريكالىق ەنەرگەتيكالىق كومپانيالار ەل ەكونوميكاسىنا ميللياردتاعان دوللار ينۆەستيسيا سالدى. بۇل ەكىجاقتى ارىپتەستىك بۇگىن دە ءوز جەمىسىن بەرىپ وتىر»، – دەدى ديپلومات.

ول قازاقستاندى «ۋران ءوندىرىسى بويىنشا الەمدىك كوشباسشى، مۇناي ەكسپورتتاۋشى ءىرى ەل جانە سيرەك كەزدەسەتىن پايدالى قازبالارعا باي مەملەكەت» دەپ سيپاتتادى. وسى رەتتە ستاففت اقش پەن قازاقستان اراسىندا جاڭا ەنەرگەتيكالىق جانە ساۋدا سالاسىنداعى ىنتىماقتاستىق ءداۋىرى باستالۋى مۇمكىن ەكەنىن ايتتى.

رەسەي مەن جۇڭگو ىقپالىنا قارسى تۇرۋ

دجۋلي ستاففتتىڭ ايتۋىنشا، رەسەي قازاقستانمەن الەمدەگى ەڭ ۇزىن قۇرلىق شەكاراسى ارقىلى ىقپالىن ساقتاپ وتىر، ال جۇڭگو تەلەكوممۋنيكاسيا مەن پايدالى قازبالار سالاسىن باقىلاۋعا تىرىسىپ كەلەدى.

«اقش ءۇشىن قازاقستاننىڭ تاۋەلسىز، تۇراقتى جانە وركەندەگەن مەملەكەت بولعانى ماڭىزدى»، – دەدى ول.

ەلشى قىزمەتىنە تاعايىندالسا، ستاففت قازاقستانعا رەسەيدەن تاۋەلسىز ەكسپورتتىق باعىتتاردى تابۋعا كومەكتەسۋگە ۋادە ەتتى. بۇل تۇرعىدا، ساراپشىلاردىڭ پىكىرىنشە، كاسپيي قۇبىر كونسورسيۋمى ارقىلى ەكسپورتتالاتىن قازاقستاندىق مۇنايدىڭ 80 پايىزى رەسەيلىك اۋماق ارقىلى وتەتىنىن ەسكەرسەك، جاڭا باعىتتار ىزدەۋ ستراتەگيالىق ماڭىزعا يە.

ينۆەستيسيا مەن قورعانىس سالاسىنداعى ىنتىماقتاستىق

ستاففت اقش-تىڭ قازاقستانعا ەنەرگەتيكا، تەحنولوگيا جانە ينفراقۇرىلىم سالالارىندا ينۆەستيسيا تارتۋعا مۇددەلى ەكەنىن اتاپ ءوتتى. سونىمەن قاتار ول سيرەك كەزدەسەتىن مينەرالدار سەكتورىنا ينۆەستيسيا تارتۋدى جانە قورعانىس سالاسىنداعى ارىپتەستىكتى دامىتۋدى باسىم باعىتتار قاتارىنا ەنگىزدى.

ديپلوماتيالىق قىزمەتتە 25 جىلدان استام تاجىريبەسى بار دجۋلي ستاففت بۇعان دەيىن رەسەي، مولدوۆا، پولشا، ەفيوپيا جانە دجيبۋتي ەلدەرىندە جۇمىس ىستەگەن. ول ورىس، رۋمىن، فرانسۋز جانە پولياك تىلدەرىن مەڭگەرگەن. قازىرگى تاڭدا ول 2024 جىلدىڭ قاڭتارىندا ديپلوماتيالىق مانسابىن اياقتاعان دەنيەل روزەنبليۋمنىڭ ىقتيمال ءىزباسارى رەتىندە قاراستىرىلىپ وتىر.