اقمولا وبلىسىندا اۋىل شارۋاشىلىعى كەسٸپورنىنا قاۋٸپ تٶنٸپ تۇر: جەر كٶلەمٸ ەكٸ ەسە ازايعان. سەرٸكتەستٸكتەن زاڭسىز تارتىپ الىنعان جەر كٶلەمٸ 18 959,01 گەكتاردى قۇرايدى, دەيدٸ كومپانييا باسشىلىعى, - دەپ حابارلايدى Dalanews.kz.
اقمولا وبلىسىنداعى ٸرٸ اۋىل شارۋاشىلىعى كەسٸپورىندارىنىڭ بٸرٸ – "زەرەندٸ-استىق" جشس ٶڭٸردە بيىلدان باستاپ اۋىل شارۋاشىلىعى جۇمىستارىن جٷرگٸزۋ قيىندايتىنىن مەلٸمدەدٸ. بۇعان كەسٸپورىن ٷلەسكەرلەرٸ اراسىنداعى كەلٸسپەۋشٸلٸكتەر, جەر قۇجاتتارىنا قاتىستى الاياقتىق ەرەكەتتەر مەن ۇزاققا سوزىلعان سوت وتىرىستارى سەبەپ.
كومپانييانىڭ باسپاسٶز قىزمەتٸنٸڭ حابارلاۋىنشا, سەرٸكتەستٸك 40 مىڭ گەكتاردان استام جەردٸ پايدالانادى. بۇل جەرلەردٸڭ باسىم بٶلٸگٸ ٷلەستٸك, ياعني كومپانييانىڭ جارعىلىق كاپيتالى جەكە ٷلەسكەر تۇلعالاردىڭ قاراجاتى ەسەبٸنەن قالىپتاستىرىلعان. الايدا كەيٸنگٸ جىلدار ٷلەسكەرلەردٸڭ بٸر توبى سەرٸكتەستٸك قۇرامىنان شىعۋ تۋرالى شەشٸم قابىلداپ, الايدا مۇنى جالعان حاتتامالار تولتىرۋمەن جٷزەگە اسىرعان.
"زەرەندٸ-استىق" جشس ديرەكتورى قايرات احمەتوۆ مۇنداي ەكٸ حاتتامانىڭ سوت شەشٸمٸمەن زاڭسىز دەپ تانىلعانىن العا تارتادى. 2022 جىلعى 5 سەۋٸردەگٸ جينالىس حاتتاماسى اقمولا وبلىسى مامانداندىرىلعان اۋدانارالىق ەكونوميكالىق سوتىمەن 2023 جىلعى 9 قاراشادا زاڭسىز دەپ تانىلسا, 2023 جىلعى 29 ناۋرىزداعى دەل وسىنداي قۇجات الماتى وبلىسى ماەس شەشٸمٸمەن 2024 جىلعى 13 تامىزدا كٷشٸن جويعان.
قايرات احمەتوۆتىڭ ايتۋىنشا, حاتتامالاردىڭ زاڭسىزدىعىنا قاراماستان, جەرگٸلٸكتٸ بيلٸك ٶكٸلدەرٸ قاجەت قۇجاتتاردى ەزٸرلەپ, سەرٸكتەستٸك قۇرامىنان شىققان ٷلەسكەرلەردٸڭ جەرلەرٸن ٶزگە كومپانييالاردىڭ اتىنا زاڭداستىرىپ بەرگەن. "زەرەندٸ-استىق" جشس باسشىسى بۇل جەردە ٷشٸنشٸ تۇلعالاردىڭ مٷددەسٸ بارىن ايتىپ, ٶتكٸزٸلگەن جينالىستاردىڭ زاڭدىلىعىنا كٷمەن كەلتٸرٸپ وتىر. ونىڭ ايتۋىنشا, حاتتامالاردا ەڭبەككە قابٸلەتسٸز نە جينالىسقا قاتىسپاعان ادامدار دا قاتىسۋشىلار تٸزٸمٸنە ەنٸپ كەتكەن. سونداي-اق جەر قۇجاتتارىنىڭ دەرەكتەرٸ دە ەرتٷرلٸ كەلتٸرٸلگەن.
ونىڭ سٶزٸنشە, ٷلەسكەرلەر جوعارى تابىستى ۋەدە ەتٸپ وتىرعان بەلگٸسٸز تۇلعالاردىڭ ىقپالىنان شىعا الماي وتىر.
"بۇل ۋەدەلەردٸڭ كٶبٸ – بوس سٶز. ولار زاڭسىز جولدارمەن ٶز كومپانييالارىنا تٸركەپ العان جەرلەرگە ەگٸن ەگٸلمەي, ارام شٶپ باسىپ جاتقانىن قازٸر كٶرٸپ وتىرمىز. بۇل بٸزدٸڭ ٷلەسكەرلەردٸ ٶز جاعىنا ٶتۋگە شاقىرىپ وتىرعان ادامداردىڭ اۋىل شارۋاشىلىعى جۇمىستارىن جٷرگٸزە المايتىنىن كٶرسەتەدٸ. جەرمەن جۇمىس ٸستەگەندە جەر ٶڭدەۋ مەدەنيەتٸن ساقتاۋ كەرەك. اگرو قىزمەت كەسٸبي جٷرگٸزٸلۋٸ تيٸس. بۇدان ٶز كەزەگٸندە بٸزدٸڭ "زەرەندٸ-استىق" جشس كومپانييامىز بەن ينۆەستورىمىز – "قازاقستان استىق كونسورتسيۋمى" ٷلكەن شىعىنعا باتىپ وتىر. ٶيتكەنٸ, بٸز تٶلەپ وتىرعان قارىزدار بٸزدٸڭ موينىمىزدا قالدى, ال جەردٸ بٸز ەكٸ ەسە از يگەرٸپ وتىرمىز", – دەدٸ قايرات احمەتوۆ.
دەگەنمەن, زەرەندٸ اۋدانىنىڭ ەكٸمٸ ەسەن جاقسىلىقوۆ بۇل جەردە لوببي نە ٶزگە دە زاڭسىز ەرەكەت بار دەگەن ايىپپەن كەلٸسپەيتٸنٸن جەتكٸزدٸ.
"جاقىندا ماعان "زەرەندٸ-استىق" جشس باسشىسىنىڭ اتىنان مەن ٶزٸمنٸڭ نە ٶز بيزنەسٸمنٸڭ مٷددەلەرٸ ٷشٸن لوببي جاساپ وتىرعانىم جٶنٸندە حات كەلدٸ. مەن رەسمي تٷردە ٶزٸمنٸڭ ەشقانداي دا مٷددەم جوق ەكەنٸن مەلٸمدەيمٸن. ال اقمولا وبلىستىق مەسليحاتىنىڭ دەپۋتاتى مارات ورازالينگە كەلسەك, قوعامدىق جۇمىستارمەن اينالىساتىن دەپۋتاتتىڭ بۇل ادامدارمەن قانداي بايلانىسى بارىن مەن بٸلمەيمٸن", – دەدٸ ول.
"زەرەندٸ-استىق" جشس مەلٸمەتٸنشە, كومپانييادان زاڭسىز جولمەن تارتىپ الىنعان ەگٸستٸككە جارامدى جەرلەردٸڭ جالپى اۋماعى 18 959,01 گەكتاردى قۇرايدى. ال بۇلاي سەرٸكتەستٸك جەرٸنٸڭ ەكٸ ەسەگە جۋىق ازايۋى كومپانييانىڭ قارىزدارىن ٶتەپ, جۇمىسشىلارىن ساقتاپ جەنە اۋىل شارۋاشىلىعى جۇمىستارىن ساپالى جٷرگٸزۋٸنە قيىندىقتار تۋدىرادى.
