Aqmola oblysynda aýyl sharýashylyǵy kásipornyna qaýip tónip tur: Jer kólemi eki ese azaiǵan. Seriktestikten zańsyz tartyp alynǵan jer kólemi 18 959,01 gektardy quraidy, deidi kompaniia basshylyǵy, - dep habarlaidy Dalanews.kz.
Aqmola oblysyndaǵy iri aýyl sharýashylyǵy kásiporyndarynyń biri – "Zerendi-Astyq" JShS óńirde biyldan bastap aýyl sharýashylyǵy jumystaryn júrgizý qiyndaitynyn málimdedi. Buǵan kásiporyn úleskerleri arasyndaǵy kelispeýshilikter, jer qujattaryna qatysty alaiaqtyq áreketter men uzaqqa sozylǵan sot otyrystary sebep.
Kompaniianyń baspasóz qyzmetiniń habarlaýynsha, seriktestik 40 myń gektardan astam jerdi paidalanady. Bul jerlerdiń basym bóligi úlestik, iaǵni kompaniianyń jarǵylyq kapitaly jeke úlesker tulǵalardyń qarajaty esebinen qalyptastyrylǵan. Alaida keiingi jyldar úleskerlerdiń bir toby seriktestik quramynan shyǵý týraly sheshim qabyldap, alaida muny jalǵan hattamalar toltyrýmen júzege asyrǵan.
"Zerendi-Astyq" JShS direktory Qairat Ahmetov mundai eki hattamanyń sot sheshimimen zańsyz dep tanylǵanyn alǵa tartady. 2022 jylǵy 5 sáýirdegi jinalys hattamasy Aqmola oblysy mamandandyrylǵan aýdanaralyq ekonomikalyq sotymen 2023 jylǵy 9 qarashada zańsyz dep tanylsa, 2023 jylǵy 29 naýryzdaǵy dál osyndai qujat Almaty oblysy MAES sheshimimen 2024 jylǵy 13 tamyzda kúshin joiǵan.
Qairat Ahmetovtyń aitýynsha, hattamalardyń zańsyzdyǵyna qaramastan, jergilikti bilik ókilderi qajet qujattardy ázirlep, seriktestik quramynan shyqqan úleskerlerdiń jerlerin ózge kompaniialardyń atyna zańdastyryp bergen. "Zerendi-Astyq" JShS basshysy bul jerde úshinshi tulǵalardyń múddesi baryn aityp, ótkizilgen jinalystardyń zańdylyǵyna kúmán keltirip otyr. Onyń aitýynsha, hattamalarda eńbekke qabiletsiz ne jinalysqa qatyspaǵan adamdar da qatysýshylar tizimine enip ketken. Sondai-aq jer qujattarynyń derekteri de ártúrli keltirilgen.
Onyń sózinshe, úleskerler joǵary tabysty ýáde etip otyrǵan belgisiz tulǵalardyń yqpalynan shyǵa almai otyr.
"Bul ýádelerdiń kóbi – bos sóz. Olar zańsyz joldarmen óz kompaniialaryna tirkep alǵan jerlerge egin egilmei, aram shóp basyp jatqanyn qazir kórip otyrmyz. Bul bizdiń úleskerlerdi óz jaǵyna ótýge shaqyryp otyrǵan adamdardyń aýyl sharýashylyǵy jumystaryn júrgize almaitynyn kórsetedi. Jermen jumys istegende jer óńdeý mádenietin saqtaý kerek. Agro qyzmet kásibi júrgizilýi tiis. Budan óz kezeginde bizdiń "Zerendi-Astyq" JShS kompaniiamyz ben investorymyz – "Qazaqstan astyq konsortsiýmy" úlken shyǵynǵa batyp otyr. Óitkeni, biz tólep otyrǵan qaryzdar bizdiń moinymyzda qaldy, al jerdi biz eki ese az igerip otyrmyz", – dedi Qairat Ahmetov.
Degenmen, Zerendi aýdanynyń ákimi Ásen Jaqsylyqov bul jerde lobbi ne ózge de zańsyz áreket bar degen aiyppen kelispeitinin jetkizdi.
"Jaqynda maǵan "Zerendi-Astyq" JShS basshysynyń atynan men ózimniń ne óz biznesimniń múddeleri úshin lobbi jasap otyrǵanym jóninde hat keldi. Men resmi túrde ózimniń eshqandai da múddem joq ekenin málimdeimin. Al Aqmola oblystyq máslihatynyń depýtaty Marat Orazalinge kelsek, qoǵamdyq jumystarmen ainalysatyn depýtattyń bul adamdarmen qandai bailanysy baryn men bilmeimin", – dedi ol.
"Zerendi-Astyq" JShS málimetinshe, kompaniiadan zańsyz jolmen tartyp alynǵan egistikke jaramdy jerlerdiń jalpy aýmaǵy 18 959,01 gektardy quraidy. Al bulai seriktestik jeriniń eki esege jýyq azaiýy kompaniianyń qaryzdaryn ótep, jumysshylaryn saqtap jáne aýyl sharýashylyǵy jumystaryn sapaly júrgizýine qiyndyqtar týdyrady.
