21 ماۋسىمدا استانا قالاسىنىڭ ازاماتتىق ىستەر جونىندەگى اۋدانارالىق سوتى داۋ-دامايدان كەيىن قىزمەتىنەن شەتتەتىلگەن عالىمجان جۋسانبايەۆتىڭ اتىراۋ مۇناي وڭدەۋ زاۋىتىنىڭ باس ديرەكتور لاۋازىمىن قالپىنا كەلتىرۋ تۋرالى ۇكىم شىعاردى، دەپ حابارلايدى Dalanews.kz.
سوتتىڭ مالىمەتىنشە، جۋسانبايەۆ كەزەكتەن تىس جالپى جينالىس حاتتاماسىن، ەڭبەك شارتىن بۇزۋ تۋرالى بۇيرىقتى جارامسىز دەپ تانۋ، باس ديرەكتور لاۋازىمىن قالپىنا كەلتىرۋ، ءماجبۇرلى جۇمىستان شىققان ۋاقىتى ءۇشىن جالاقىنى ءوندىرىپ الۋ جانە مورالدىق زياندى وتەۋ تۋرالى "ءاموز" ج ش س ۇستىنەن ارىزدانعان.
"تالاپ قويۋ ەڭبەك شارتىنىڭ سىناق مەرزىمىندە جانە قىزمەتكەردىڭ ۋاقىتشا ەڭبەككە جارامسىزدىق كەزىندە بۇزىلۋىمەن نەگىزدەلدى. سوتپەن ەڭبەك شارتىنىڭ تالاپتارى بويىنشا تالاپكەرگە 6 اي سىناق مەرزىمى بەلگىلەنگەنى، الايدا شارت ءبىر اي وتكەننەن كەيىن بۇزىلعانى انىقتالدى. وسى قۇقىقتىق قاتىناستارعا ەڭبەك زاڭناماسى قولدانىلادى. ەڭبەك كودەكسىنىڭ 36-بابىنا سايكەس، ەڭبەك شارتىن جاساسقان كەزدە ەڭبەك شارتىندا جۇمىسكەردىڭ تاپسىرىلاتىن جۇمىسقا بىلىكتىلىگىنىڭ سايكەستىگىن تەكسەرۋ ماقساتىندا سىناق مەرزىمى تۋرالى تالاپ بەلگىلەنۋى مۇمكىن"، دەلىنگەن سوت حابارلاماسىندا.
سونداي-اق اتالعان كودەكستىڭ 37-بابىنا سايكەس، جۇمىسكەردىڭ سىناق مەرزىمى كەزەڭىندەگى جۇمىسى تەرىس ناتيجە بەرگەن كەزدە، جۇمىس بەرۋشى وعان ەڭبەك شارتىن بۇزۋعا نەگىز بولعان سەبەپتەر كورسەتىلگەن حابارلاما بەرىپ، ونىمەن ەڭبەك شارتىن بۇزۋعا قۇقىلى ەكەنى دە ناقتىلانادى.
"بۇل جاعدايدا قىزمەتكەر سىناق مەرزىمىندە جۇمىستىڭ تەرىس ناتيجەسى بولماسادا ەشقانداي سەبەپسىز جۇمىستان بوساتىلدى. سوت شەشىمىمەن تالاپ قاناعاتتاندىرىلدى. سوت جاۋاپكەرمەن قىزمەتكەردىڭ سىناق مەرزىمىندەگى بىلىكتىلىگىنە سايكەس ەمەستىگى دالەلدەنبەگەندىكتەن تالاپكەردىڭ قۇقىقتارى بۇزىلعان دەپ تانىدى.ەڭبەك شارتى جۇمىستان شىعارۋ ءراسىمىن بۇزا وتىرىپ كۇشىن جويعان. ەڭبەك شارتىن بۇزۋ تۋرالى بۇيرىقتى جارامسىز دەپ تانۋ، ج.-نىڭ باس ديرەكتور لاۋازىمىن قالپىنا كەلتىرۋ تۋرالى شەشىم شىعارىلىپ، ءماجبۇرلى جۇمىسقا كەلمەگەنى ءۇشىن جالاقىسى جانە 100 000 تەڭگە مولشەرىندە مورالدىق زياندى وتەۋ ءوندىرىلدى".
