بۇگىن وبلىس اكىمى اماندىق باتالوۆ تالدىقورعانداعى «اينالايىن» بالالار ۇيىنە بارىپ، تاربيەلەنۋشىلەرىن جاڭا جىلمەن قۇتتىقتادى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.

– بۇگىن سەندەردى جاڭا جىلدارىڭمەن قۇتتىقتاۋعا ارنايى كەلدىم. پرەزيدەنتىمىز نۇرسۇلتان ءابىش ۇلى نازاربايەۆتىڭ باسشىلىعىمەن جاس وركەننىڭ بۇگىنى مەن بولاشاعى ءۇشىن بارلىق جاعداي جاسالۋدا. ءارقايسىلارىڭ كۇنى ەرتەڭ ەلىمىزدىڭ مىقتى ازاماتى بولىپ وسەسىڭدەر، وعان دەيىن ۇزدىك وقىپ، جاقسى ءبىلىم الۋعا تالپىنىڭدار. ءبىز ءوز تاراپىمىزدان جاندارىڭنان تابىلۋعا، قامقورلىق جاساۋعا، ءار بالانىڭ باقىتتى بولۋىنا بارلىق مۇمكىندىكتى جاسايتىن بولامىز. جاڭا جىلدا بارشاڭىزعا مىقتى دەنساۋلىق، كوتەرىڭكى كوڭىل، مول جەتىستىكتەر تىلەيمىن. 2018 جاڭا جىل جاقسىلىعىمەن، جاڭالىعىمەن كەلسىن! – دەدى ا. باتالوۆ. بالالارعا جاڭا جىلدىق سىيلىقتار مەن تاتتىلەر ۇلەستىرىلدى. سول سياقتى بالعىنداردىڭ وتىنىشتەرى بويىنشا بالالار ۇيىنە نوۋتبۋك سىيعا تارتىلدى.

ءوز كەزەگىندە بالالار قوناقتارعا جاڭا جىلدىق كونسەرتتىك باعدارلامالارىن ۇسىندى.