بۇگىن «AMANAT»-تىڭ ورتالىق اپپاراتىندا پارتياعا سالتاناتتى قابىلداۋ ءراسىمى ءوتتى. بيزنەس، ۇكىمەتتىك ەمەس ۇيىمدار، باسقا دا ءتۇرلى سالا وكىلدەرى جانە بەلسەندى جاستار «AMANAT» قاتارىن تولىقتىردى.

سالتاناتتى ءراسىمدى اشقان «AMANAT» پارتياسىنىڭ اتقارۋشى حاتشىسى اسحات ورالوۆ پارتيا – بۇل ەڭ الدىمەن ورتاق قۇندىلىق اياسىندا بىرىككەن مۇددەلەس ازاماتتاردىڭ ۇيىمى ەكەنىن اتاپ ءوتتى.

– ءقازىر پارتيا ترانسفورماسيالانۋ كەزەڭىندە. بۇل رەتتە «AMANAT» ەلىمىزدىڭ باستى ساياسي كۇشى جانە مەملەكەت باسشىسىنىڭ قوعامداعى تىرەگى بولىپ قالا بەرەدى. وزدەرىڭىزگە ءمالىم، پرەزيدەنت قاسىم-جومارت توقايەۆ اۋقىمدى ساياسي رەفورمالار پاكەتىن  جاريالاپ، ەلىمىز وزگەرىستەر جولىنا ءتۇستى. ماۋسىم ايىندا جالپىحالىقتىق رەفەرەندۋم وتەدى جانە وعان ءاربىر پارتيا مۇشەسىنىڭ، ءاربىر ازاماتتىڭ قاتىسۋى – ءبىزدىڭ ورتاق بورىشىمىز، – دەپ اتاپ ءوتتى اسحات ورالوۆ.

اتقارۋشى حاتشى «AMANAT» پارتياسىنىڭ ترانسفورماسيالاۋعا قاتىستى جوبالارىن ساپالى ىسكە اسىرۋعا پارتيانىڭ جاڭا مۇشەلەرى ءوز ۇلەسى مەن تىڭ يدەياسىن قوسادى دەگەن سەنىم ءبىلدىردى.

بۇگىن پارتيا قاتارىنا قوسىلعانداردىڭ اراسىندا – تەلەجۋرناليست ماقسات تولىقباي، «Talap» كەاق پرەزيدەنتى ولجاس وردابايەۆ، «ادىلەت» رەسپۋبليكالىق قاۋىمداستىعىنىڭ ءتورايىمى دينارا قۇدايقۇلوۆا، «قازاقستان حالقىنا» قوعامدىق قورى باسقارما ءتوراعاسىنىڭ ورىنباسارى ءلاززات شىڭعىسبايەۆا، «قورعان» مۇگەدەكتەر قوعامدىق بىرلەستىگىنىڭ باسشىسى نۇرگۇل بايقازاقوۆا، «كومفورتستروي» ج ش س باس ديرەكتورى بەكزات مىرزاحمەت جانە تاعى باسقالار بار.

«Talap» كەاق پرەزيدەنتى ولجاس وردابايەۆتىڭ پىكىرىنشە، بۇگىندە قوعام الدىندا ۇلكەن سىن-قاتەرلەر تۇر، ولاردى ەڭسەرۋ ءۇشىن بىرىگۋ قاجەت. «سوندىقتان  «AMANAT» پارتياسىنا قوسىلۋ – ءبارىمىز ءۇشىن دە ايتۋلى وقيعا. ءبىز پارتيا مەن ەلدى ودان ءارى كوركەيتۋ ءۇشىن بار كۇش-جىگەرىمىزدى سالامىز»، دەدى ولجاس وردابايەۆ.

ءوز كەزەگىندە، تەلەجۋرناليست ماقسات تولىقباي ازاماتتاردىڭ پروبلەمالارىن شەشۋ ءۇشىن «AMANAT» پارتياسىنىڭ زور الەۋەتى بار ەكەنىن اتاپ ءوتتى.

– ماعان ءتۇرلى ماسەلەلەرمەن ءجيى جۇگىنەدى، جۋرناليست رەتىندە ولاردى قوعامعا، مەملەكەتتىك ورگاندارعا جەتكىزۋگە تىرىسامىن. ەندى پارتيا قاتارىنا قوسىلۋ ارقىلى مەندە ولاردى شەشۋدىڭ تاعى ءبىر قۇرالى بولادى، – دەدى ول.

«ءبىز بارلىق سالادا ترانسفورماسيا كەزەڭىن باستان وتكەرىپ جاتىرمىز جانە «AMANAT» پارتياسى وسى ءىستىڭ الدىڭعى شەبىندە تۇر. پارتيا قاتارىنا قوسىلۋ – ءبىر جاعىنان جاڭا مۇمكىندىكتەرگە جول اشسا، ەكىنشى جاعىنان ۇلكەن جاۋاپكەرشىلىك جۇكتەيدى» دەدى ساياساتتانۋشى، جۋرناليست سايات جوكەن.

«جاستار الاۋى» قورىنىڭ ءتورايىمى ديليارا بەگالى قىزى پارتيا قاتارىنا قوسىلۋ – ەلىمىزدىڭ دامۋىنا ءوز ۇلەسىن قوسۋ ءۇشىن تاعى ءبىر مۇمكىندىك بەرەتىنىن اتاپ ءوتتتى. «جاستار مەملەكەت پەن قوعامنىڭ قوزعاۋشى كۇشى بولۋى ءتيىس. ءدال وسى پارتيا جاستاردىڭ ءومىر ساپاسىن ارتتىرىپ، الەۋەتىن اشا الاتىنىنا سەنىمدىمىن»، دەپ ءوز ويىمەن ءبولىستى ديليارا بەگالى قىزى.

پارتيا قاتارىنا قابىلداۋ «AMANAT»-تىڭ بارلىق وڭىردەگى فيليالدارىندا ءوتىپ جاتىر.