Amanat پارتياسى اقسۋ اۋداندىق فيليالىنىڭ باسشىسى سەرىكقان جاقىپوۆ 7 جاستاعى بۇلدىرشىنگە جىنىستىق سيپاتتاعى زورلىق-زومبىلىق جاسادى دەگەن كۇدىككە ءىلىندى، دەپ حابارلايدى Dalanews.kz.
بۇل تۋرالى اقسۋ اۋداندىق پوليسيا ءبولىمى ءمالىم ەتتى.
مالىمەتكە سۇيەنسەك، ساراپتاما 7 جاسار بالاعا كۇش قولدانۋ فاكتىسىن راستادى. بالانىڭ اناسى اقسۋ اۋداندىق ىشكى ىستەر بولىمىنە ارىز جازعان.
اقسۋ اۋداندىق پوليسيا ءبولىمىنىڭ مالىمەتىنشە، كامەلەتكە تولماعان تۇلعاعا قاتىستى جىنىستىق سيپاتتاعى زورلىق فاكتىسى بويىنشا سوتقا دەيىنگى تەرگەۋ باستالدى.
“كۇدىكتى ۇستالىپ، ۋاقىتشا ۇستاۋ يزولياتورىنا قامالدى. قاجەت سوت-مەديسينالىق ساراپتامالار تاعايىندالىپ، تەرگەۋ شارالارى جۇرگىزىلىپ جاتىر. تەرگەۋ شەڭبەرىندەگى باسقا دەرەكتەر قىلمىستىق ءىس جۇرگىزۋ كودەكسىنىڭ 201-بابىنا ساي جاريالانبايدى”، – دەلىنگەن حابارلامادا.
Amanat پارتياسىنىڭ جەتىسۋ وبلىستىق فيليالى جاقىپوۆتىڭ ەندى پارتيادا جۇمىس ىستەمەيتىنىن مالىمدەدى.
“امانات”پارتياسى جەتىسۋ وبلىسى اقسۋ اۋداندىق فيليالىنىڭ ەكس-باسشىسى 2024 جىلدىڭ 1 تامىزىندا ءوز ەركىمەن قىزمەتىنەن كەتتى”، – دەلىنگەن حابارلامادا.
