«AMANAT» پارتياسى: شەڭبەرتال اۋىلىنداعى سۋ مۇناراسى – جەمقورلىقتىڭ سيمۆولى

Dalanews 23 مام. 2023 06:06 432

اقتوبە وبلىسىنىڭ ىرعىز اۋدانىنداعى جانىس بي جانە شەڭبەرتال اۋىلدارىندا 1500-گە جۋىق ادام تۇرادى. بۇگىندە ولاردىڭ بارلىعى قۇدىقتىڭ سۋىن ءىشىپ وتىر. ال سۋدىڭ ساپاسى مەن سانيتارلىق جاعدايى كوڭىل كونشىتپەيدى. ونىڭ ۇستىنە، قۇدىقتىڭ سۋى اۋىق-اۋىق تارتىلىپ كەتەدى. ماسەلەنىڭ ءمان-جايى «AMANAT» پارتيالىق باقىلاۋ كوميتەتىندە تالقىلاندى.

پارتيالىقتار انىقتاعانداي، اتالعان اۋىلداردا «كولساي ستروي» جشس-ى ۇزىندىعى 42،3 كم بولاتىن سۋ قۇبىرىن سالۋى كەرەك ەدى. الايدا، قۇبىر پايدالانۋعا قابىلدانبادى. سەبەبى ونى سالۋ كەزىندە قۇرىلىس تالاپتارى بۇزىلعان.

«سۋ كەلەدى دەپ ۇمىتتەنگەن كوپتەگەن تۇرعىن ءوز ۋچاسكەسىنە قۇبىر جۇرگىزىپ، قاجەتتى قۇرال-جابدىقتار ساتىپ العان، ءتىپتى سول كەرەك-جاراق زاتتاردى الۋ ءۇشىن قارىزعا دا باتتى. الايدا، قازىرگى ۋاقىتتا ناقتى مەردىگەردىڭ بولماۋىنا جانە كوپتەگەن كەمشىلىكتەردىڭ ورىن الۋىنا بايلانىستى سۋ قۇبىرىن پايدالانۋعا بەرۋ مۇمكىن ەمەس. شەڭبەرتالداعى سۋ سورعى ستانساسى – وسى اۋىلدا العاش رەت سالىنعان نىسان. جۇمىسىنا ءجۇردىم-باردىم قارايتىن شەنەۋنىكتەر تۇرعىزعان سۋ مۇناراسى بۇگىندە سىبايلاس جەمقورلىقتىڭ سيمۆولىنا اينالدى»، – دەدى پارتيالىق باقىلاۋ ينسپەكتورى ايجان ىسقاقوۆا.

بۇعان جاۋاپ رەتىندە ەكولوگيا مينيسترلىگى سۋ رەسۋرستارى كوميتەتىنىڭ ءتوراعاسى نۇرلان الدامجاروۆ «كولساي سترويعا» قاتىستى سوتقا تالاپ ارىز جولدانعانىن حابارلادى.

«ايتا كەتۋ كەرەك، 2022 جىلى سۋ قۇبىرى سىناق رەجيمىندە قوسىلدى. 1 ساۋىردەن باستاپ ەلەكتر ەنەرگياسىنىڭ بەرەشەگىنە بايلانىستى سۋ بەرۋدى توقتاتتى. «كولساي ستروي» ەكى ايدىڭ ىشىندە بارلىق كەمشىلىك جويىلادى دەپ سەندىرىپ وتىر.

قىركۇيەك ايىنا دەيىن تولىق پايدالانۋعا بەرىپ، وبلىستىق كوممۋنالدىق مەنشىككە وتكىزەمىز. ءبىزدىڭ كوميتەت بۇكىل رەسپۋبليكا بويىنشا وسىنداي نىسانداردىڭ تاپسىرىس بەرۋشى بولىپ تابىلادى، سوندىقتان دا بارلىق جەردەگى قۇرىلىس جۇمىستارىن قاداعالاپ ۇلگەرمەيمىز. بىزدە وسى جۇمىسپەن اينالىساتىن تەك 4 مامان بار»، - دەدى ول.


ءماجىلىس دەپۋتاتى نۇرجان اشىمبەتوۆ تاپسىرىس بەرۋشىنىڭ اتقاراتىن قىزمەتى سۋ رەسۋرستارى كوميتەتىنە ءتان ەمەس ەكەنىن العا تارتتى. ويتكەنى ولار استانادا وتىرىپ قۇرىلىس ساپاسىن باقىلاي المايدى. سوندىقتان ول قولدانىستاعى جۇمىس ءتارتىبىن قايتا قاراۋدى ۇسىندى.

«بۇل ماسەلەنى ەشكىم كوتەرگەن جوق، ءتىپتى، پارتيانىڭ اۋداندىق فيليالى دا ءۇنسىز وتىر. جەكە ءوزىڭىز بارىپ، سۋ قۇبىرىن پايدالانۋعا بەرگەنشە سول جەردە وتىرىڭىز. ادامداردىڭ سۋسىز قالاي ءومىر ءسۇرىپ جاتقانىن ءوز كوزىڭىزبەن كورىپ، سول جەردە تۇرىپ كورىڭىز. شىلدە ايىنىڭ سوڭىنا دەيىن اۋىل تۇرعىندارى قۇبىرمەن كەلەتىن سۋدىڭ يگىلىگىن كورۋى كەرەك»، - دەدى پبك مۇشەسى مايرا ايسينا.
جيىنعا قاتىسۋشىلار قوعامدىق رەزونانسقا قاراماستان ماسەلەنى شەشۋگە اسىقپاعان «AMANAT»-تىڭ ىرعىز اۋداندىق فيليالىنىڭ سىلبىر ارەكەتىن دە سىنعا الدى.


«اتالعان ماسەلە وڭىرلىك سايلاۋالدى باعدارلاماعا جانە ونى ىسكە اسىرۋ جونىندەگى جول كارتاسىنا ەنگىزىلمەگەن. بۇل جەرگىلىكتى حالىقتىڭ پروبلەمالارىن زەردەلەۋ بويىنشا وبلىستىق جانە اۋداندىق فيليالداردىڭ جۇمىسىندا ايتارلىقتاي كەمشىلىكتىڭ بار ەكەنىن دالەلدەيدى. سونىمەن قاتار پارتيانىڭ اۋداندىق فيليالى ءبىر جارىم جىل ىشىندە ءىس جۇزىندە ءتيىستى مەملەكەتتىك ورگاندارعا بىردە-بىر حات جىبەرمەگەن، ال پارتيانىڭ ورتالىق اپپاراتىنا ورىن العان جاعداي تۋرالى اقپارات ۋاقتىلى جەتكىزىلمەدى»، - دەپ اتاپ ءوتتى پارتيا حاتشىسى ەرجان جىلقىبايەۆ.

جيىن سوڭىندا كوميتەت «AMANAT»-تىڭ ىرعىز اۋداندىق فيليالىنىڭ اتقارۋشى حاتشىسىن، ىرعىز اۋداندىق پارتيالىق باقىلاۋ كوميسسياسىنىڭ ءتوراعاسىن جانە اقتوبە وبلىستىق پارتيالىق باقىلاۋ كوميسسياسىنىڭ ءتوراعاسىن پارتيالىق جاۋاپكەرشىلىككە تارتۋعا قاۋلى ەتتى.

ۇسىنىلعان
سوڭعى جاڭالىقتار