بۇگىن پرەمەر-مينيستر مەن ۇكىمەت مۇشەلەرىنىڭ قاتىسۋىمەن پرەزيدەنتتىڭ جولداۋلارى مەن سايلاۋالدى باعدارلاماسىن ىسكە اسىرۋ بويىنشا ماجىلىستە «AMANAT» پارتياسى فراكسياسىنىڭ كەڭەيتىلگەن وتىرىسى ءوتتى.

وندا ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ قازاقستاننىڭ بولاشاعى ءۇشىن اەس سالۋدىڭ ماڭىزدىلىعىن جانە ەلىمىزدىڭ بارلىق پروگرەسسيۆتى كۇشتەردىڭ وسى باستامانى تولىق قولداۋى قاجەتتىگىن ايتتى.

– قازىرگى ۋاقىتتاعى قىزۋ تالقىلانىپ جاتقان ەڭ وزەكتى ماسەلە – اتوم ەلەكتر ستانسياسىن سالۋ. «AMANAT» فراكسياسىنىڭ دەپۋتاتتارى مەملەكەت باسشىسىنىڭ رەفەرەندۋم وتكىزۋ تۋرالى يدەياسىن تولىق قولدايدى.

«AMANAT» پارتياسى وسى ناۋقاندى ۇكىمەتپەن بىرلەسىپ، جوعارى دەڭگەيدە وتكىزۋگە اتسالىسۋعا، كەڭ اۋقىمدا ءاقپاراتتىق-تۇسىندىرۋ جۇمىسىن ۇيىمداستىرۋعا دايىن. ەلىمىزدەگى بارلىق ساياسي پارتيالار، ۇكىمەتتىك ەمەس ۇيىمدار بىزبەن بىرگە پرەزيدەنتتىڭ وسى پروگرەسسيۆتى باستاماسىن ىسكە اسىرۋعا جۇمىلادى دەپ سەنەمىز، – دەدى ەرلان قوشانوۆ.

پرەمەر-مينيستر ولجاس بەكتەنوۆ دەپۋتاتتاردى پرەزيدەنتتىڭ جولداۋلارى مەن 2023-2029 جىلدارعا ارنالعان «ادىلەتتى قازاقستان: ءبارىمىز جانە ءارقايسىمىز ءۇشىن. ءقازىر جانە ءاردايىم» سايلاۋالدى باعدارلاماسىنىڭ ىسكە اسىرىلۋ بارىسى تۋرالى حاباردار ەتتى.

– مەملەكەت باسشىسى ايقىنداپ بەرگەن ماقسات – 2029 جىلعا قاراي ۇلتتىق ەكونوميكا كولەمىن 450 ملرد دوللارعا دەيىن جەتكىزۋ. بۇل – ءبىزدىڭ ستراتەگيالىق باعدارىمىز.

ەكونوميكا قۇرىلىمىن تۇبەگەيلى وزگەرتۋ باعىتىندا بەلسەندى شارالار قابىلدانۋدا. قايتا وڭدەۋ ونەركاسىبى، ماشينا جاساۋ، اقپاراتتىق تەحنولوگيالار جانە باسقا دا زاماناۋي، جوعارى تەحنولوگيالىق جانە يننوۆاسيالىق سالالار ەلىمىزدىڭ جاڭا ەكونوميكاسىنىڭ ىرگەتاسى بولۋعا ءتيىس، – دەدى ولجاس بەكتەنوۆ.

پرەمەر-مينيستر ۇكىمەتتىڭ وتاندىق تاۋار وندىرۋشىلەرىن قولداۋ بويىنشا اۋقىمدى جۇمىس جۇرگىزىپ جاتقانىن اتاپ ءوتتى. ينۆەستيسيا كولەمى 15 ترلن تەڭگەدەن اساتىن 17 ءىرى جوبا جۇزەگە اسىرىلۋدا، بۇل 26 مىڭ جۇمىس ورنىن قۇرۋعا جانە يمپورتقا تاۋەلدىلىكتى 1،5 ترلن تەڭگەگە تومەندەتۋگە مۇمكىندىك بەرەدى.

سونىمەن قاتار مەملەكەتتىك ساتىپ الۋ شەڭبەرىندە قازاقستاندىق كاسىپورىندارمەن جاسالعان كەلىسىمشارتتاردىڭ سانى 1،4 ەسەگە ارتتى، ال ولاردىڭ جالپى سوماسى 40%-عا ءوستى.

سونداي-اق ۇكىمەت باسشىسى ەلدىڭ اگروونەركاسىپتىك كەشەنىن قولداۋعا باعىتتالعان زاماناۋي اگروتەحنولوگيالاردى دامىتۋعا جانە اۋىل شارۋاشىلىعىن ءارتاراپتاندىرۋعا ارنالعان شارالار تۋرالى ايتىپ بەردى.

– بيىل ەگىس ناۋقانىن قارجىلىق جانە ماتەريالدىق-تەحنيكالىق قامتاماسىز ەتۋ ماسەلەلەرى نەگىزىنەن شەشىلدى. كوكتەمگى دالا جۇمىستارىن جانە ەگىن جيناۋ ناۋقانىن قارجىلاندىرۋ سوماسى 4 ەسەگە، 580 ملرد تەڭگەگە دەيىن ۇلعايتىلدى. بۇل – سوڭعى جىلدار ىشىندەگى ەڭ اۋقىمدى قارجىلاندىرۋ كولەمى.

«اۋىل اماناتى» جوباسى بويىنشا اۋقىمدى جۇمىس جۇرگىزىلىپ جاتىر. سوڭعى ەكى جىلدا اۋىل تۇرعىندارىنا 100 ملرد تەڭگەدەن استام سوماعا شاعىن نەسيەلەر بەرىلدى. ناتيجەسىندە 20 مىڭعا جۋىق ازامات ءوز كاسىبىن اشتى، — دەدى پرەمەر-مينيستر.

ولجاس بەكتەنوۆ ۇكىمەت الەۋمەتتىك ماسەلەلەردى شەشۋگە ەرەكشە نازار اۋدارىپ وتىرعانىن، سوندىقتان مەملەكەت بيۋدجەتىنىڭ جارتىسىنان كوبىسى الەۋمەتتىك سالاعا باعىتتالعانىن اتاپ ءوتتى.

— ماسەلەن، كوللەدج ستۋدەنتتەرىنە ستيپەنديا مولشەرى 50%-عا، باكالاۆرياتقا 20%-عا، ماگيستراتۋرا مەن دوكتورانتۋراعا 15%-عا ارتتى. 1 قىركۇيەكتەن باستاپ 445 مىڭ ستۋدەنتتىڭ ستيپەندياسى وسەدى. سونىمەن قاتار زياندى ەڭبەك جاعدايلارىندا جۇمىس ىستەيتىن قىزمەتكەرلەر ءۇشىن الەۋمەتتىك تولەم ەنگىزىلدى. بۇگىندە 1،7 ملرد تەڭگە كولەمىندە اتالعان تولەمدى 9 مىڭنان استام جۇمىسشى الدى، – دەپ ءتۇسىندىردى ول.

پرەمەر-مينيستر سونداي-اق جۇمىسقا ورنالاستىرۋ، ميكروكرەديت بەرۋ، سۋبسيديالاۋ، مەديسينالىق ساقتاندىرۋ جۇيەسىنە تارتۋ ارقىلى ءومىردىڭ قيىن جاعدايىنا تاپ بولعان وتباسىلار سانىن قىسقارتۋ تەتىگى تۋرالى ايتىپ بەردى.

تالقىلاۋ قورىتىندىسى بويىنشا ەرلان قوشانوۆ الەمدەگى كۇردەلى گەوساياسي احۋالعا جانە ەلدەگى تابيعي اپاتتارعا قاراماستان، مەملەكەتتىڭ نەگىزگى الەۋمەتتىك مىندەتتەمەلەرى تولىق ورىندالىپ جاتقانىن ايتتى. ول مەملەكەت باسشىسى جىل سايىنعى جولداۋلارىندا حالىقتىڭ ءال-اۋقاتىن ارتتىرۋعا جانە ەلدى دامىتۋعا باعىتتالعان اۋقىمدى مىندەتتەر قوياتىنىن اتاپ ءوتتى.

– پرەزيدەنت جولداۋلارىنداعى، سايلاۋالدى باعدارلاماسىنداعى تاپسىرمالاردى ساپالى ورىنداۋ – بارشامىزدىڭ باستى مىندەتىمىز. ءقازىردىڭ وزىندە مەملەكەت باسشىسىنىڭ بارلىق جولداۋى، بەرگەن ۋادەلەرى تولىق ورىندالىپ جاتىر دەپ سەنىممەن ايتا الامىز.

ولار ءار ازاماتتىڭ، ءار وتباسىنىڭ، ءار قالانىڭ، ءار اۋىلدىڭ نەگىزگى ماسەلەلەرىن شەشۋگە باعىتتالعان. سوندىقتان الداعى ۋاقىتتا دا وسى قارقىندى باسەڭدەتپەۋىمىز كەرەك. پارلامەنت، ۇكىمەت، جەرگىلىكتى اتقارۋشى ورگاندار مەن ازاماتتىق قوعام ۇيلەسىمدى ءارى تياناقتى جۇمىس ىستەۋگە ءتيىس، – دەدى ءماجىلىس سپيكەرى.

سونداي-اق ەرلان قوشانوۆ الەمدەگى كۇردەلى گەوساياسي احۋالعا جانە ەلدەگى تابيعي اپاتتارعا قاراماستان، مەملەكەتتىڭ نەگىزگى الەۋمەتتىك مىندەتتەمەلەرى تولىق ورىندالىپ جاتقانىن ايتتى. سونىمەن قاتار ول حالىقتى الاڭداتىپ جانە ۇكىمەت تاراپىنان باسا نازار اۋدارىلۋىن تالاپ ەتەتىن ءبىرقاتار ماسەلەگە توقتالدى. بۇل – كوكتەمگى سۋ تاسقىنىنىڭ سالدارىن جويۋ، باعانىڭ ءوسۋى، جۇمىسسىزدىق، جىلۋ بەرۋ ماۋسىمىنا دايىندىق، مەكتەپتەر مەن اۋرۋحانالار جەتىسپەۋشىلىگى.

وتىرىستى قورىتىندىلاي كەلە، ءماجىلىس سپيكەرى پرەمەر-مينيستر ولجاس بەكتەنوۆكە جانە ۇكىمەتتىڭ بارلىق مۇشەسىنە بىرلەسكەن جەمىستى جۇمىسى ءۇشىن العىسىن ءبىلدىردى. بۇل رەتتە، ول فراكسيا پرەمەر-مينيستر لاۋازىمىنا قاتارىنان ەكىنشى رەت كانديداتۋرا ۇسىنىپ وتىرعانىن، ال ءماجىلىس كوميتەتتەرى مينيسترلەر كابينەتىنىڭ ءاربىر مۇشەسىنىڭ كانديداتۋراسىن كەلىسەتىنىن ايتتى.

سوندىقتان دەپۋتاتتار مەن ۇكىمەت مەملەكەت باسشىسىنىڭ بارلىق تاپسىرماسىنىڭ ورىندالۋى بويىنشا حالىق الدىندا دا، پرەزيدەنت الدىندا دا جاۋاپكەرشىلىگى ورتاق. ءماجىلىس ءتوراعاسى ءدال وسى ءتاسىل قاسىم-جومارت توقايەۆ جاريالاعان «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتىن جۇزەگە اسىرۋعا مۇمكىندىك بەرەتىنىن اتاپ ءوتتى.