ەكس پرەزيدەنتتىڭ كىشى قىزى ءاليا نازاربايەۆامەن بىرگە قۇنى 179 ميلليون دوللار كاسىپتى باسىپ الدى دەگەن كۇدىككە ىلىنگەن ۆالەنتينا روگوۆانىڭ كۇيەۋى مالىمدەمە جاسادى، - دەپ حابارلايدى Dalanews.kz.
ايتا كەتەيىك، جاقىندا ءاليا نازاربايەۆا مەن كونستيتۋسيالىق كەڭەستىڭ بۇرىنعى باسشىسى ۆالەنتينا روگوۆاعا "رەيدەرلىك شابۋىل جاسادى" دەگەن ايىپ تاعىلعان بولاتىن. روگوۆانىڭ كۇيەۋى يگور روگوۆ Exclusive.kz باسىلىمىنا پىكىر ءبىلدىرىپ، بۇل ىسكە قاتىستى مالىمدەمە جاساعان. ونىڭ سوزىنشە، ايەلى ۆالەنتينا 2003 جىلى ءاليا نازاربايەۆاعا تيەسىلى ۇيىمدا كەڭەس بەرۋ قىزمەتتەرىن كورسەتىپ، زاڭگەر بولىپ جۇمىس ىستەگەن. ول كەزدەرى ايەلى ەلدە تانىمال ادۆوكاتتاردىڭ ءبىرى بولعان كورىنەدى.
"ول بىرنەشە پروسەستى ءساتتى اياقتاعان. ءوز جۇمىسىن كاسىبي تۇرعىدا ادال اتقاراتىن"، - دەيدى يگور روگوۆ.
ونىڭ سوزىنشە، ايەلى كاسىپكەر نۇرلان بيمۋرزيننىڭ ءاليا نازاربايەۆا مەن ۆالەنتينا روگوۆاعا قاتىستى ايتقاندارىن جوققا شىعارىپ وتىر.
"ونداي كەلىسىمدەردىڭ ءبارى نوتاريۋس ارقىلى وتەدى. سايكەسىنشە قۇجاتتاردىڭ زاڭدىلىعى زاڭ كەڭەسشىسىمەن ەمەس، نوتاريۋس ارقىلى شەشىلۋى كەرەك. ونىڭ (ۆالەنتينا روگوۆانىڭ) مۇنداي قۇجاتتارعا قول قويۋىنا قۇزىرى بولمادى. سوندىقتان "ۆالەنتينا روگوۆا ءاليا نازاربايەۆامەن رەيدەرلىك شابۋىل جاسادى" دەگەن ب ا ق بەتتەرى مەن الەۋمەتتىك جەلىدە تاراپ جاتقان اقپارات جالعان دەپ سانايمىن"، - دەيدى يگور روگوۆ.
ايتا كەتەيىك، بۇعان دەيىن ءاليا نازاربايەۆا مەن كونستيتۋسيالىق كەڭەستىڭ بۇرىنعى باسشىسى ۆالەنتينا روگوۆاعا "رەيدەرلىك شابۋىل جاسادى" دەگەن ايىپ تاعىلعان بولاتىن.
"2003 جىلى (نازاربايەۆا – قازتاگ) ءوز ۇستەمدىگىن پايدالانا وتىرىپ، قۇنى 170 ميلليون دوللاردى قۇرايتىن (2003 جىلعى ەسەپ بويىنشا) جەتى مۇناي بازاسى مەن 96 جانارماي قۇيۋ بەكەتىنەن تۇراتىن كاسىپورىندى قولدى ەتكەن. ال بۇرىنعى يەلەرىن "تۇرمەگە قاماپ، دەنە جاراقاتىن سالامىن" دەپ قورقىتقان. ءتىپتى تاپا تال تۇستە كاسىپ يەلەرىنىڭ ءبىرىنىڭ اكەسىن اشىق تۇردە ۇرلاپ اكەتكەن. بۇل ءوزىنىڭ ىقپالىن كورسەتۋ ءۇشىن جاسالعان ارەكەت.
كۋاگەرلەردىڭ ايتۋىنشا، ادام ۇرلاۋعا قۇقىق قورعاۋ ورگاندارىنىڭ قاتىسى بولۋى مۇمكىن. قىلمىسقا سىبايلاس قاتىسۋشى ۆالەنتينا روگوۆا بولعان.
ول - قازاقستان رەسپۋبليكاسى كونستيتۋسيالىق كەڭەسىنىڭ ءتوراعاسى، پرەزيدەنتتىڭ كومەكشىسى، پرەزيدەنتتىڭ كەڭەسشىسى جانە باسقا دا كوپتەگەن مەملەكەتتىك قىزمەتتەردى اتقارعان يگور يۆانوۆيچ روگوۆتىڭ ايەلى"، - دەلىنگەن ۇلتتىق باسپا ءسوز كلۋبىنىڭ حابارلاماسىندا.
