قازاق ەستراداسىنىڭ ەڭ تانىمال انشىلەرىنىڭ ءبىرى التىناي جورابايەۆا تەلەجۇرگىزۋشى ءلايلا سۇلتان قىزىنىڭ ءوزىن الداپ سوققانىن ايتتى. ايتۋىنشا، ءانشىنى «حابار» تەلەارناسىنداعى «تىكەلەي ەفير» توك-شوۋىنا الداپ شاقىرعان ەكەن. ەندى جۋرناليستكە وكپەسى قارا قازانداي بولعان التىناي تىكەلەي ەفيرگە شىعۋدان باس تارتىپ وتىر.

بۇل تۋرالى جورابايەۆا ءوزىنىڭ Instagram-پاراقشاسىندا مالىمدەدى. الايدا، ارادا بىرنەشە ساعات وتكەننەن كەيىن ول جازعان جازباسىن قايتا ءوشىرىپ تاستادى. التىنايدىڭ سوزىنەن ۇققانىمىز، ءلايلا سۇلتان قىزى ونى «تىكەلەي ەفيرگە» كەلىپ شىعارماشىلىعى، استاناداعى ءومىرى جايلى ايتىپ بەرۋىن سۇراعان ەكەن. ول بولسا ويلانباي كەلىسكەن. الايدا، «تىكەلەي ەفير» جوباسىنىڭ Instagram-پاراقشاسىنداعى انونستا التىناي مەن ءسابيتتىڭ نە ءۇشىن اجىراسقانى تۋرالى مالىمدەيمىز دەپ جارناما تاراتقان. التىنايدىڭ جازباسىنان كەيىن بۇل جارناما دا «جوعالىپ» كەتتى.

– مىناۋ نە سۇمدىق؟ نەگە مەنىمەن اقىلداسپايدى؟ قىزدارىمدى شاقىرىپ، ەفيرگە شىعارىپ قويىپ، ءسابيت ەكەۋىمىزدىڭ ءومىرىمىزدى بۇكىل حالىقتىڭ الدىندا نە ءۇشىن تالقىلاۋىمىز كەرەك؟ باعدارلاماعا شاقىراتىن كەزدە تەك مەنىڭ شىعارماشىلىعىم، استانادا قالاي تۇرىپ جاتقانىمىز، قىزدارىم استانانى قالاي قابىلدادى، اكەم مەن انامنان مەنىڭ بالالىق شاعىم جايىندا وي وربىتەتىندەرى جايلى عانا ايتقان بولاتىن. ال مىنانى قالاي تۇسىنۋگە بولادى؟ – دەپ اشىنا جازدى التىناي جورابايەۆا.

ايتا كەتەيىك، «تىكەلەي ەفير» بۇگىن ساعات 15.00-دە كورسەتىلەدى. الايدا، وعان التىناي جورابايەۆا شىعا ما، جوق پا، ول جاعى بەلگىسىز قالىپ وتىر.

دەرەككوزى: stan.kz