استانا قالاسىنىڭ تۇرعىندارى جۇمىسشى ماماندىقتار جىلىنا وراي ۇيىمداستىرىلعان رەسپۋبليكالىق «التايدان ورالعا دەيىن» ۆەلوشەرۋىنىڭ قاتىسۋشىلارىن سان-سالتاناتپەن قارسى الدى، – دەپ حابارلايدى Dalanews.kz
سارىارقا اۋدانىنداعى كوكتال ساياباعىندا ولاردى استانا قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى ازامات اعزاموۆ، ءبىلىم باسقارماسى باسشىسىنىڭ ورىنباسارى مارجان قايىربايەۆا، تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ بۇقارالىق سپورتتى دامىتۋ ءبولىمىنىڭ باسشىسى جاندوس ماحمۇت ۇلى، سول سياقتى ەڭبەك ۇجىمدارى، كوللەدج ستۋدەنتتەرى جانە سپورتسۇيەر قاۋىم زور ىقىلاسپەن قۇتتىقتاپ، قوشەمەت كورسەتتى.
بۇل رەسپۋبليكالىق ۆەلوشەرۋ – جۇمىسشى ماماندىقتارىنىڭ قوعامداعى مارتەبەسىن ارتتىرۋعا ارنالعان ماڭىزدى شارا. مۇنداي باستامالار ەڭبەكتىڭ ءقادىرىن ايقىنداپ، تەحنيكالىق جانە وندىرىستىك سالالارعا جاستاردىڭ قىزىعۋشىلىعىن وياتۋدى ماقسات ەتەدى.
1000 شاقىرىمنان استام جولدى ەڭسەرىپ، ەلورداعا امان-ەسەن جەتكەن ۆەلوشاباندوزدار بۇدان ءارى اقمولا وبلىسىنىڭ اتباسار قالاسىنا ايالدايتىن بولادى.
ايتا كەتەيىك، ۆەلوشەرۋدىڭ سالتاناتتى اشىلۋ ءراسىمى وسكەمەندەگى تاۋەلسىزدىك مونۋمەنتى جانىندا ءوتىپ، سول جەردەن ساپارعا شىققان بولاتىن. قاتىسۋشىلار شىعىس قازاقستان، اباي، پاۆلودار وبلىستارى ارقىلى ءجۇرىپ ءوتىپ، استاناعا جەتتى. الدا ولار اقمولا، قوستاناي، اقتوبە جانە باتىس قازاقستان وبلىستارىنا ات باسىن بۇرادى. ۆەلوشەرۋگە 236 ۆەلوشاباندوز جانە وسكەمەندەگى تەحنيكالىق جانە كاسىپتىك ءبىلىم بەرۋ ۇيىمدارىنىڭ 200-دەن استام ستۋدەنتى قاتىسۋدا. ۆەلوشەرۋ 8 ماۋسىمدا مارەسىنە جەتەدى دەپ جوسپارلانىپ وتىر.
