ورال قالاسىنداعى تاۋەلسىزدىك مونۋمەنتى جانىندا جۇمىسشى ماماندىقتار جىلى اياسىندا ۇيىمداستىرىلعان «التايدان ورالعا دەيىن» رەسپۋبليكالىق ۆەلوشەرۋىنىڭ جابىلۋ ءراسىمى ءوتتى،- دەپ حابارلايدى Dalanews.kz
ءىس-شاراعا ق ر تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ وكىلى ازامات ورازوۆ، سونداي-اق باتىس قازاقستان وبلىسىنىڭ سپورت جانە ءبىلىم باسقارمالارىنىڭ باسشىلارى باقداۋلەت ءسابيتوۆ پەن ەلدوس سافۋللين قاتىستى.
ۆەلوشەرۋدى مەملەكەتتىك ورگانداردىڭ وكىلدەرى، ستۋدەنتتەر، قالا تۇرعىندارى مەن ۆەلوسپورت جانكۇيەرلەرى دە قولداپ، قاتىسۋشىلارعا قوشەمەت كورسەتتى.
ازامات ورازوۆ رەسپۋبليكالىق ۆەلوشەرۋدىڭ جاستار اراسىندا سالاماتتى ءومىر سالتىن ناسيحاتتاۋ جانە وسكەلەڭ ۇرپاقتىڭ جۇمىسشى ماماندىقتارىنا دەگەن قىزىعۋشىلىعىن ارتتىرۋ باعىتىندا ماڭىزدى باستاما ەكەنىن اتاپ ءوتتى.
ەسكە سالا كەتەيىك، مەملەكەت باسشىسىنىڭ تاپسىرماسىنا سايكەس، 2025 جىل – جۇمىسشى ماماندىقتار جىلى دەپ جاريالانعان بولاتىن. «التايدان ورالعا دەيىن» ۆەلوشەرۋى ەڭبەككە دەگەن قۇرمەتتىڭ جارقىن ۇلگىسىنە اينالىپ، جۇمىسشى ماماندىقتارىنىڭ وڭ ءيميدجىن قالىپتاستىرۋعا ۇلەس قوستى. مۇنداي باستامالار تەحنيكالىق جانە وندىرىستىك سالالارعا جاستاردىڭ قىزىعۋشىلىعىن ارتتىرىپ، ەلدىڭ تۇراقتى دامۋىنا اسەر ەتەدى.
