جەتىسۋ اۋدانىندا بۇرىنعى وندىرىستىك قۋاتىن جوعالتقان كاسىپورىنداردىڭ ونەركاسىپتىك قورىن كەزەڭ-كەزەڭىمەن قايتا قۇرۋ جۇمىستارى باستالدى. الماتى اكىمى دارحان ساتىبالدىنىڭ تاپسىرماسىمەن جۇمىس ىستەپ تۇرعان ءارى بۇرىن بەلسەندى قىزمەت اتقارعان وندىرىستىك الاڭداردىڭ بازاسىندا شاعىن ونەركاسىپ پاركتەرىن قۇرۋ جونىندەگى قالالىق باستاما جۇزەگە اسىرىلىپ جاتىر، دەپ حابارلايدى Dalanews.kz.
قازىرگى ۋاقىتتا اۋداندا اۋماعىن جاڭعىرتىپ، شاعىن ونەركاسىپ پارككە اينالدىرۋعا دايىن ەكەنىن بىلدىرگەن 10-نان استام ونەركاسىپتىك كاسىپورىن ايقىندالدى. بۇل ينفراقۇرىلىمنىڭ توزۋى نەمەسە تەحنولوگيانىڭ ەسكىرۋىنە بايلانىستى ءوز بەتىنشە جاڭارۋعا مۇمكىندىگى جوق بولعانىمەن، ينجەنەرلىك جەلىلەرى تارتىلعان وندىرىستىك الاڭدارى ساقتالعان ماڭىزدى نىساندار.
شاعىن ونەركاسىپ پاركتەرىنىڭ فورماتى ءبىر مەزەتتە بىرنەشە شاعىن جانە ورتا بيزنەس سۋبەكتىسىن ورنالاستىرۋعا ارنالعان زاماناۋي وندىرىستىك كەڭىستىك قۇرۋعا باعىتتالعان. مۇنداي ءتاسىل بۇرىن تولىق پايدالانىلماعان سەحتار مەن قويما عيماراتتارىن قايتادان شارۋاشىلىق اينالىمعا ەنگىزۋگە مۇمكىندىك بەرەدى.
العاشقى پيلوتتىق الاڭدار رەتىندە ونەركاسىپتىك الەۋەتى جوعارى ءارى ورنالاسۋى قولايلى نىساندار ىرىكتەلدى. ولاردىڭ قاتارىندا بەتون جانە تەمىربەتون بۇيىمدارىن شىعاراتىن «تەمىربەتون-1»، جول قوزعالىسىن ۇيىمداستىرۋعا ارنالعان ونىمدەر وندىرەتىن «جول بەلگىلەرى زاۋىتى»، سونداي-اق بۇرىن الماتى ەت كومبيناتى ورنالاسقان اۋماقتاعى «نۇرالەم الماتى» بار.
قازىرگى كەزدە الماتى اكىمدىگىنىڭ قولداۋىمەن كاسىپكەرلەر «Almaty Finance» اق ارقىلى جەڭىلدەتىلگەن قارجىلاندىرۋ الۋ ءۇشىن قۇجاتتار توپتاماسىن ازىرلەپ جاتىر. قاراجات عيماراتتاردى جاڭارتۋعا، ينجەنەرلىك ينفراقۇرىلىمدى جاڭعىرتۋعا جانە جاڭا وندىرىستەردى ىسكە قوسۋعا باعىتتالادى.
جوسپار بويىنشا شاعىن يندۋستريالىق پاركتەردىڭ اۋماعى 5 مىڭنان 10 مىڭ شارشى مەترگە دەيىن جەتەدى. قارجىلاندىرۋ بەكىتىلىپ، رۇقسات قۇجاتتارى راسىمدەلگەن سوڭ زاماناۋي، ءقاۋىپسىز ءارى ەكولوگيالىق تالاپتارعا ساي وندىرىستىك الاڭداردى قۇرۋعا باعىتتالعان قۇرىلىس-مونتاج جۇمىستارى باستالادى.
