بيىل الماتى «Geo-Analytics.kz» يننوۆاسيالىق جوباسى ءۇشىن Tech-InnovaCity نوميناسياسى بويىنشا سىيلىقتىڭ قولا جۇلدەگەرى اتاندى. ۆەللينگتون (جاڭا زەلانديا) التىن، مادريد (يسپانيا) جانە لوس-اندجەلەس (اقش) وسى نوميناسيادا كۇمىس جۇلدەنى الدى.
بايقاۋعا 240 ءوتىنىم كەلىپ ءتۇستى: يننوۆاسيالىق شەشىمدەردى ۇسىنعان قالالار عانا ەمەس، سونىمەن قاتار بىرەگەي تەحنولوگيالىق ونىمدەردى ازىرلەگەن جەكە كومپانيالار دا قاتىستى. قازىلار القاسى جوبالاردى ءۇش نوميناسيا بويىنشا باعالادى، ولار: Tech-Innovaciy، Human-CentriCity جانە LLeadership.
«اقىلدى قالا» سىيلىعى سەۋل باسقاراتىن WeGO حالىقارالىق قاۋىمداستىعىنىڭ قولداۋىمەن وتەدى. WeGO 160 قالانى، 37-دەن استام جوعارى تەحنولوگيالىق كومپانيالاردى جانە قالالىق پروسەستەردى اۆتوماتتاندىرۋ ءۇشىن يننوۆاسيالاردى دامىتۋعا جانە جاساندى ينتەللەكتتى ەنگىزۋگە باعىتتالعان 18 حالىقارالىق زەرتتەۋ ۇيىمدارىن بىرىكتىرەدى.
ۇيىمدا قازاقستان اتىنان الماتى مەن استانا قاتىسادى. WeGO-مەن ىنتىماقتاستىق «اقىلدى قالالار» سالاسىنداعى ۇزدىك تاجىريبەلەر جانە ستاندارتتارمەن ءوزارا الماسۋ ءۇشىن حالىقارالىق پلاتفورماعا قوسىلۋعا مۇمكىندىك بەرەدى. ۇيىمنىڭ الماتىدا نەعۇرلىم ءتيىمدى ءوزارا ءىس-قيمىل جاساۋ جونىندەگى وڭىرلىك كەڭسەسىن اشۋ مۇمكىندىگى قاراستىرىلۋدا.
انىقتاما: الماتىنىڭ «Geo-Analytics.kz» پلاتفورماسى وزگەرىستەر تاريحىن ساقتاي وتىرىپ، ناقتى ۋاقىت رەجيمىندە ءتۇرلى دەرەكتەردى بىرىكتىرۋگە قابىلەتتى. ونىڭ 2020 جىلى قۇرىلۋى Ovid-19 پاندەمياسىنىڭ قيىندىقتارىنا جاۋاپ بولدى. پلاتفورما قالالىق قىزمەتتەردىڭ تيىمدىلىگىن ارتتىرۋعا ىقپال ەتتى ءارى ەڭ وسال ايماقتاردى قاداعالادى جانە ۆيرۋستىڭ ىقتيمال تارالۋ باعىتتارىن بولجادى.
ءقازىر «Geo-Analytics.kz» قالالىق دەرەكتەردى تالداۋدىڭ امبەباپ قۇرالىنا اينالدى. بارلىق كەلىپ تۇسكەن اقپاراتتى وڭدەي وتىرىپ، جۇيە مەكتەپتەردىڭ، حقكو-لاردىڭ، بالاباقشالاردىڭ ناقتى قاي جەردە جەتىسپەيتىنىن كورسەتە الادى، جول ينفراقۇرىلىمى جۇكتەمسىنە باعا بەرەدى، اتاۋلى كومەك كورسەتۋ ءۇشىن شاعىن جانە ورتا بيزنەستىڭ بەلسەندىلىگىن باقىلايدى. پلاتفورما تالداۋى بيۋدجەتتى ءتيىمدى جوسپارلاۋعا، قالالىق قىزمەتتەردىڭ جۇمىسىن وڭتايلاندىرۋعا جانە وزگەرىستەرگە جەدەل جاۋاپ بەرۋگە مۇمكىندىك بەرەتىن دەپەرسونيفيسيرلەنگەن دەرەكتەردى جينايدى.
