الاتاۋ اۋدانىندا الەۋمەتتىك ينفراقۇرىلىم بەلسەندى تۇردە دامىپ كەلەدى. بۇل تۋرالى قالا اكىمى ەربولات دوسايەۆ اۋدان تۇرعىندارىمەن كەزدەسۋ بارىسىندا ايتتى،– دەپ حابارلايدى Dalanews.kz

اۋدانداعى وقۋشى ورىندارىنىڭ تاپشىلىعى – 6،1 مىڭ ورىن. بۇل ماسەلەنى شەشۋ ماقساتىندا وتكەن جىلى جەرگىلىكتى بيۋدجەت ەسەبىنەن «سايالى-2» شاعىناۋدانىندا 550 ورىندىق جاڭا مەكتەپ سالىندى. سونداي-اق  «زەردەلى» شاعىناۋدانىندا تاعى ءبىر 550 ورىندىق مەكتەپتىڭ قۇرىلىسى ءجۇرىپ جاتىر.

سونىمەن قاتار، «جايلى مەكتەپ» ۇلتتىق جوباسى اياسىندا الاتاۋ اۋدانىندا جالپى سىيىمدىلىعى 12،7 مىڭ وقۋشىنى قامتيتىن 7 مەكتەپتىڭ قۇرىلىسى ءجۇرىپ جاتىر. جاڭا وقۋ جىلىندا تەرەكتى، سامعاۋ، قاراسۋ جانە اقبۇلاق شاعىناۋداندارىندا بەس مەكتەپ اشۋ جوسپارلانعان.

ال «العاباس» جانە «عاجايىپ» شاعىناۋداندارىنداعى ەكى مەكتەپتىڭ قۇرىلىسى 2025 جىلدىڭ سوڭىنا دەيىن اياقتالماق.

ايتا كەتەيىك، الماتىدا «جايلى مەكتەپ» ۇلتتىق جوباسى اياسىندا 34،8 مىڭ جاڭا وقۋشى ورنى اشىلادى دەپ جوسپارلانعان.

سونىمەن قاتار، قولدانىستاعى مەكتەپتەردىڭ سىيىمدىلىعىن ارتتىرۋ ماقساتىندا №195، 174، 35، 112، 99 جانە 73 مەكتەپتەرگە قوسىمشا عيماراتتار سالىنىپ جاتىر. بۇل 1 755 قوسىمشا وقۋشى ورنىن اشۋعا مۇمكىندىك بەرەدى.

سونداي-اق  11 ءبىلىم بەرۋ مەكەمەسىندە قايتا جاڭعىرتۋ جانە سەيسموكۇشەيتۋ جۇمىستارى جۇرگىزىلىپ جاتىر. ولار: №33 ليسەي، №161 ليسەي، №191، №58، №189، №50، №160 مەكتەپتەر، №59 مەكتەپتىڭ فيليالى، سونداي-اق، №73، №30 جانە №60 گيمنازيالار.