الماتى قالاسى اكىمدىگىنىڭ مەملەكەتتىك اكتيۆتەر باسقارماسى “جاس وتاۋ” نەكە سارايىن سەنىمگەرلىك باسقارۋعا العان “التىن ءدان قازاقستان” كومپانياسىنا قارسى كەزەكتى سوتتا تاعى دا جەڭىسكە جەتتى، دەپ حابارلايدى Dalanews.kz.

Bes.media اگەنتتىگىنىڭ مالىمەتىنشە، تاريحي-مادەني مۇرا سانالاتىن نىسان 2016 جىلى 20 جىلعا “التىن ءدان قازاقستان” كومپانياسىنا سەنىمگەرلىك باسقارۋعا بەرىلگەن. كومپانيا كەلىسىم بويىنشا سارايعا كەمىندە 500 ملن تەڭگە كولەمىندە جوندەۋ جانە اباتتاندىرۋ جۇمىستارىن جۇرگىزۋى ءتيىس بولعان.

الايدا مىندەتتەمەلەر ورىندالماعان سوڭ، پروكۋراتۋرا 2022 جىلى كەلىسىمدى بۇزۋدى تالاپ ەتتى.

2023 جىلى سوت عيماراتتى مەملەكەت مەنشىگىنە قايتارۋ تۋرالى شەشىم شىعاردى.

2024 جىلى شەشىمدى ۋاقىتىلى ورىنداماعانى ءۇشىن كومپانيادان 1،2 ملن تەڭگە ايىپپۇل ءوندىرىلدى.

داۋدىڭ جاڭا كەزەڭىندە جاعداي باسقاشا ءوربىدى. بۇل جولى كومپانيانىڭ ءوزى مەملەكەتتىك ورگاننان شىعىندارىن وتەپ بەرۋدى تالاپ ەتتى.

“التىن ءدان قازاقستان” سەنىمگەرلىك باسقارۋ كەزىندە جوندەۋ، اباتتاندىرۋ جانە جابدىقتاۋعا قارجى سالعانىن العا تارتىپ، مەملەكەتتەن 157،3 ملن تەڭگەنى ءوندىرىپ بەرۋدى سۇرادى.

مەملەكەتتىك اكتيۆتەر باسقارماسى سوتتا بۇرىنعى شەشىمدەرگە سۇيەنە وتىرىپ، كومپانيا ءوز مىندەتتەمەلەرىنىڭ باسىم بولىگىن ورىنداماعانىن ەسكە سالدى.

اتاپ ايتقاندا، جوبالىق-سمەتالىق قۇجاتتاما دايىندالماعان، كۇردەلى جوندەۋ جۇرگىزىلمەگەن، ينۆەستيسيالىق جوسپار جۇزەگە اسپاعان، نىساننىڭ ءوزى ناشارلاعان.

بۇل دەرەكتەر پرەسەدەنتتىك سيپاتقا يە، ياعني قايتادان دالەلدەۋدى قاجەت ەتپەيدى.

پروكۋرور دا تالاپتى قاناعاتتاندىرۋعا نەگىز جوق ەكەنىن ايتتى.

سوت تا كومپانيانىڭ تالاپ ارىزىن قاناعاتتاندىرمادى. وعان سەبەپ شىعىنداردىڭ نەگىزدىلىگى دالەلدەنبەگەن، كەلىسىلگەن جوبالىق قۇجاتتار جوق، ۋاكىلەتتى ورگانداردىڭ رۇقساتتارى ۇسىنىلماعان، تاريحي نىسان بولعاندىقتان، مادەنيەت باسقارماسىمەن كەلىسىم دە الىنباعان.

“التىن ءدان قازاقستان” ءجشس-نىڭ 157،3 ملن تەڭگە ءوندىرۋ تۋرالى تالابى قاناعاتتاندىرىلماسىن”، — دەلىنگەن سوتتىڭ رەسمي شەشىمىندە.