– الماتىداعى اتىس لاڭكەستىك شابۋىلعا تەڭەستىرىلىپ وتىر. قازىرگى جاعدايدا الماتى عانا ەمەس، بۇكىل رەسپۋبليكا كولەمىندە لاڭكەستىكتىڭ ءقاۋپى جوعارى. وكىنىشكە قاراي، بيلىك مۇنى كەش اڭعاردى. 2000-جىلداردىڭ ورتاسىنان باستاپ قامدانۋ كەرەك ەدى. سوڭعى 10 جىلدا مىڭداعان قازاقستاندىق راديكالدى يدەولوگيانىڭ ارباۋىنا ءتۇسىپ قالدى. الماتىداعى وقيعا سونىڭ كەزەكتى كورىنىسى، – دەيدى دوسىم ساتبايەۆ.
ونىڭ ايتۋىنشا، كۇش قۇرىلىمدارىنىڭ قىزمەتكەرلەرىنە شابۋىل جاساۋ راديكالداردىڭ «داستۇرىنە» ەنىپ كەتكەن.
– قازاقستاننىڭ ءتۇرلى وڭىرىندە كۇش قۇرىلىمدارىنىڭ وكىلدەرىنە وق وتقان وقيعالارعا كۋا بولدىق. ولار وسى ارقىلى ءبىر وقپەن ەكى قويان اتىپ الۋدى كوزدەيدى. ءبىرىنشىسى، بيلىكتىڭ شاراسىزدىعى، ەكىنشىسى ەل اراسىندا پوليسياعا دەگەن سەنىمسىزدىك تۋعىزۋ، – دەپ سانايدى ساراپشى.
ساتبايەۆتىڭ سوزىنە قاراعاندا، پوليسيا مەن راديكالدار اراسىنداعى قاقتىعىس الماتىدا بۇدان بۇرىن دا بولعان.
– 2000-شى جىلداردىڭ باسىندا الماتىدا كۇش قۇرىلىمدارى مەن راديكالدار اراسىندا ۇلكەن اتىس بولدى. تەررورلىق قاۋىپ-قاتەردىڭ العاشقى بەلگىلەرى، مىنە، سول كەزدەرى بايقالعان بولاتىن. انىعىندا، الماتى قالاسى قازاقستان عانا ەمەس، سونىمەن بىرگە، باسقا دا ەلدەردەن كەلگەن راديكالدى قۇرىلىمدار شوعىرلانعان جەر. ال قازىرگى جاعدايدى قوسا قاراستىرعاندا، احۋالدىڭ بۇدان ءارى دە ۋشىعا تۇسەتىنىن بولجايمىن، – دەيدى ساتبايەۆ.
ساراپشىنىڭ ايتۋىنشا، ەندىگى جەردە بارلىق قازاقستان تۇرعىندارى «لاڭكەستىك قاۋىپ-قاتەردىڭ كورىنىس بەرەتىن جاعدايىندا» ءومىر سۇرەتىنىن سەزىنۋى كەرەك.
– تۇرعىندارعا ساق بولعان ءجون جانە قۇقىق قورعاۋ ورگاندارىنا بارىنشا كومەكتەسۋى قاجەت. قوعام مەن بيلىك بىرىكپەي، لاڭكەستىككە قارسى ءتيىمدى كۇرەسە المايمىز. وكىنىشكە قاراي، بيلىك اركەز كەش قيمىلدايدى، سەبەبىمەن ەمەس، سالدارىمەن كۇرەسەدى. لاڭكەستىك قاۋىپ-قاتەردىڭ الدىن-الۋعا باعىتتالعان جۇمىستار اتىمەن جوق. ءتىپتى، بار بولعان كۇننىڭ وزىندە، بۇل باعىتتاعى جۇمىس ءتيىمدى ءجۇرىپ جاتىر دەپ ايتا المايمىن، – دەيدى ساتپايەۆ.
