الماتىداعى توتەنشە جاعدايلار جانە دۇلەي ءزىلزالالار ءقاۋپىن ازايتۋ ورتالىعى بازاسىندا ورتالىق ازيا ەلدەرىنىڭ توتەنشە ۆەدومستۆولارى باسشىلارىنىڭ كەزدەسۋى ءوتتى،- دەپ حابارلايدى Dalanews.kz
ءىس-شاراعا قازاقستان رەسپۋبليكاسىنىڭ توتەنشە جاعدايلار ءمينيسترى گەنەرال-مايور شىڭعىس ءارىنوۆ، قىرعىز رەسپۋبليكاسىنىڭ توتەنشە جاعدايلار ءمينيسترى گەنەرال-مايور بووبەك اجيكەيەۆ، تاجىكستان رەسپۋبليكاسى ۇكىمەتىنىڭ جانىنداعى توتەنشە جاعدايلار جانە ازاماتتىق قورعانىس كوميتەتىنىڭ ءتوراعاسى گەنەرال-پولكوۆنيك رادجابالي راحمونالي جانە وزبەكستان رەسپۋبليكاسى توتەنشە جاعدايلار ءمينيسترىنىڭ ءبىرىنشى ورىنباسارى پولكوۆنيك سانجار زۋپاروۆ قاتىستى.
ورتالىق قىزمەتىنىڭ تۇساۋكەسەرى جانە وزبەكستان مەن تاجىكستاننىڭ ونىڭ باعدارلامالارى جانە باستامالارىنا قوسىلۋ مۇمكىندىگى تالقىلاۋدىڭ نەگىزگى تاقىرىبى بولدى.
«توتەنشە جاعدايلاردىڭ الدىن الۋ جانە ولاردى جويۋ سالاسىنداعى وڭىرلىك ىنتىماقتاستىقتى نىعايتۋ ورتالىق ازيا ەلدەرىنىڭ قاۋىپسىزدىگى مەن ورنىقتى دامۋىن قامتاماسىز ەتۋدىڭ نەگىزگى فاكتورى بولىپ تابىلادى. قازاقستان تجم ورتالىقتىڭ الەۋەتىن دامىتۋعا قولداۋ كورسەتىپ، تاجىريبە جانە تەحنولوگيالارمەن بولىسۋدە، سونداي-اق وزبەكستان مەن تاجىكستاندى ورتالىق ازياداعى ءزىلزالالار ءقاۋپىن ازايتۋ جونىندەگى ءبىرىڭعاي جۇيەگە ينتەگراسيالاۋ باعىتىنداعى كۇش-جىگەردى قولدايدى»، - دەپ شىڭعىس ءارىنوۆ اتاپ ءوتتى.
ديالوگ بارىسىندا تاراپتار اقپارات الماسۋ تەتىكتەرىن، بىرلەسكەن وقۋ-جاتتىعۋلار وتكىزۋدى، توتەنشە جاعدايلارعا دەن قويۋدى ۇيلەستىرۋدى، سونداي-اق كليماتتىق جانە ەكولوگيالىق قاۋىپ-قاتەرلەردىڭ كۇشەيۋى جاعدايىندا ىنتىماقتاستىقتى نىعايتۋ ماسەلەلەرىن تالقىلادى.
كليماتتىڭ وزگەرۋ سالدارىنا بەيىمدەلۋ جانە ءزىلزالالار ءقاۋپىن ازايتۋعا باعىتتالعان بىرلەسكەن ستراتەگيالاردى ازىرلەۋ ماسەلەلەرىنە ەرەكشە نازار اۋدارىلدى.
كەزدەسۋ قورىتىندىسى بويىنشا قاتىسۋشىلار كۇش-جىگەردى ودان ءارى بىرىكتىرۋگە جانە حالىقتىڭ قاۋىپسىزدىگىن قامتاماسىز ەتۋگە باعىتتالعان ءبىرىڭعاي وڭىرلىك ءتاسىلدى ازىرلەۋگە دايىن ەكەندىكتەرىن ءبىلدىردى.
