الماتى قالاسى قالا قۇرىلىسىن باقىلاۋ باسقارماسى باسشىسىنىڭ ورىنباسارى ولجاس تولەبايەۆتىڭ مالىمەتىنشە، قالا اۋماعىندا 823 وبەكتىنىڭ (بيۋدجەتتىك 240، كوممەرسيالىق 583)، ونىڭ ىشىندە 155 تۇرعىن ءۇي كەشەنىنىڭ قۇرىلىسى جۇرگىزىلۋدە.
2023 جىلى 740 جوسپاردان تىس تەكسەرۋ جۇرگىزىلىپ، جالپى سوماسى 187 ملن تەڭگەگە اكىمشىلىك ايىپپۇل سالىنعان 956 بۇزۋشىلىق انىقتالعان.
ساپاسىز قۇرىلىس جانە قۇرىلىس-مونتاجداۋ جۇمىستارىن جۇرگىزگەنى ءۇشىن 312-باپ بويىنشا 35،7 ملن. تەڭگە سوماسىنا 47 مەردىگەر ۇيىم جاۋاپكەرشىلىككە تارتىلدى، ونىڭ ىشىندە بيۋدجەتتىك وبەكتىلەر بويىنشا 9 ملن. تەڭگە سوماسىنا 14 مەردىگەر ۇيىم، كوممەرسيالىق وبەكتىلەر بويىنشا 27،6 ملن تەڭگە سوماسىنا 33 مەردىگەر ۇيىم جازالاندى.
جىل باسىنان باستاپ سوتتارعا زاڭسىز سالىنعان وبەكتىلەردى بۇزۋ تۋرالى 53 تالاپ-ارىز جولدانعان. زاڭسىز سالىنعان 19 وبەكت بۇزىلدى. ليسەنزيادان كەيىنگى باقىلاۋ قورىتىندىسى بويىنشا 20 قۇرىلىس ليسەنزياسىنىڭ قىزمەتى ۋاقىتشا توقتاتىلدى، 247 ليسەنزياسىنىڭ كۇشى جويىلدى.
