الماتىدا ءۇش ادام مەرت بولعان اۆتوبۋس اپاتىنا قاتىستى سوت وتىرىسى ءوتتى، - دەپ حابارلايدى Dalanews.kz.
سوت وتىرىسى بارىسىندا پروكۋرور اۆتوبۋس جۇرگىزۋشىسىن ۇرىپ جىبەرگەن كۇدىكتى ەر ادامدى 8 جىلعا سوتتاۋدى سۇرادى.
وقيعا بىلتىر 22 جەلتوقساندا الماتىدا بولعان ەدى. ەر ادام اۆتوبۋس جۇرگىزىپ كەلە جاتقان ايەلدى ۇرىپ جىبەرگەن. ايەل ادام ەسىنەن تانىپ، ايالدامادا تۇرعان ادامدارعا سوعىلعان. سالدارىنان ءۇش ادام جەدەل جاردەم كەلگەنشە جان تاپسىردى.
بۇعان دەيىن جابىرلەنۋشى تاراپ 40 ملن تەڭگە تالاپ ەتكەن بولاتىن.
كەزەكتى تىڭدالىمدا ءبىرىنشى ءسوز جابىرلەنۋشى تاراپتىڭ قورعاۋشىسىنا بەرىلگەن. زاڭگەر بۇل جولى جانتۇرشىگەرلىك كولىك اپاتىندا كوز جۇمعان ازاماتتاردىڭ جاقىندارىنىڭ تالاپتارىن جىپكە ءتىزىپ شىقتى.
"الماتى" تەلەارناسى مالىمەتىنشە، سۋديا جاۋاپتى كومپانيا "دۋمانترانستىڭ"، كولىك جۇرگىزۋشىسى ەرمەك شوكەبايەۆانىڭ جانە سوتتالۋشى دارحان احمەتجانوۆتىڭ ازاماتتىق كودەكستىڭ "بىرلەسىپ كەلتىرىلگەن زيان" بابى بويىنشا 40 ميلليون تەڭگە كولەمىندە مورالدىق شىعىن وتەۋگە مىندەتتەلۋىن سۇراپ وتىر.
"اۆتوبۋس جۇرگىزۋشىسى شوكەبايەۆاعا قاتىستى قىلمىستىق ءىس قىسقارىلعانىمەن، ازاماتتىق تالاپ بويىنشا ءبىز سول اۆتوبۋستىڭ يەسى "دۋمانترانسقا" جانە سونىڭ جۇرگىزۋشىسى شوكەبايەۆاعا مورالدىق شىعىندى وتەۋ تۋرالى ازاماتتىق تالاپ-ارىز بەرە الامىز"، - دەيدى جابىرلەنۋشى تاراپتىڭ قورعاۋشىسى ايتىنعالي تابىلدين.
ءدۇيىم جۇرتتىڭ جاعاسىن ۇستاتقان وقيعاعا قاتىستى كەزەكتى سوت وتىرىسىندا اۆتوبۋس ىشىندە بولعان كۋاگەرلەر دە سويلەدى. اناسىنىڭ رۇقساتىن العان سوڭ سوت زالىنا كامەلەتكە تولماعان ءجاسوسپىرىم شاقىرىلىپ، كولىك جۇرگىزۋشىسى مەن سوتتالۋشىنىڭ اراسىندا بولعان جانجالدىڭ ءمان-جايىن ءتۇسىندىردى. سونداي-اق، كۋاگەر ەرمەك شوكەبايەۆانىڭ تولىق ەسىنەن تانىپ قالعانىن جوققا شىعاردى. ونىڭ ايتۋىنشا، جۇرگىزۋشى ابىر-سابىر باستالعاندا وعان "تەجەگىشتى باس" دەگەن ەكەن.
"بۇل كىسى ورتاڭعى ەسىكتەن ءتۇسىپ كەتپەكشى بولدى. ال جۇرگىزۋشى الدىڭعى ەسىكتەن شىعىپ، چەك كورسەتۋىن تالاپ ەتتى. بۇل كىسى چەكتى كورسەتە المادى. كوپ نارسە ايتىلدى نەگىزى، "وسى جەردەن ءتۇسىرىپ كەت، بولماسا، مەن سەنى ۇيتەمىن-بۇيتەمىن" دەگەندەي. جۇرگىزۋشى "قولىڭنان كەلسە ىستەپ كور" دەپ قارسى ءسوز ايتتى"، - دەيدى كۋاگەر.
