الماتىدا سوت شەشٸمٸمەن «تاۋلى قىرات» ٶك 2767 جەنە 2768 ۋچاسكەدە قۇرىلىسى اياقتالماعان ەكٸ ٷي بۇزىلدى,- دەپ حابارلايدى Dalanews.kz الماتى قالاسىنىڭ قالا قۇرىلىسىن باقىلاۋ باسقارماسىنا سٸلتەمە جاساپ.
جەكە مەنشٸك يەسٸ (جەكە تۇلعا) رۇقساتسىز تاۋ بٶكتەرٸندە ٷي سالعان. سونىمەن قاتار, قۇرىلىس جۇمىستارى كەزٸندە اتالعان اۋماقتارعا جول سالۋ ٷشٸن تاۋ بٶكتەرٸنٸڭ ەتەگٸ كەسٸلٸپ, ەكوجٷيەگە زالال كەلتٸرٸلگەن.
باسقارما جەر ۋچاسكەلەرٸن باستاپقى قالپىنا كەلتٸرۋ تۋرالى نۇسقاما بەرٸپ, مەنشٸك يەسٸنە قاتىستى ەكٸمشٸلٸك شارالار قابىلدادى.
الايدا نۇسقامادا كٶرسەتٸلگەن تالاپتار ورىندالماعاندىقتان, باسقارما سوتقا مەجبٷرلەپ بۇزۋ تۋرالى تالاپ-ارىز بەرگەن.
2024 جىلى 17 قازاندا مەدەۋ اۋداندىق سوتى تالاپ-ارىزدى قاناعاتتاندىرىپ, سوت قاۋلىسى الماتى قالاسىنىڭ ەدٸلەت دەپارتامەنتٸنە ورىنداۋعا جٸبەرٸلگەن.
سوت شەشٸمٸن ورىنداۋ ماقساتىندا جۋىردا مەنشٸك يەسٸ زاڭسىز نىسانداردى ٶزٸ بۇزىپ تاستادى.
