الماتىدا جاڭا تۋعان سابيلەردى ساتىپ كەلگەن قىلمىستىق توپتىڭ جولى كەسىلدى. بۇل تۋرالى ق ر ىشكى ىستەر مينيسترلىگى مالىمدەدى. ارنايى وپەراسيانى ۇلتتىق قاۋىپسىزدىك كوميتەتى مەن پوليسيا بىرلەسىپ جۇرگىزگەن، دەپ حابارلايدى Dalanews.kz.

تەرگەۋ مالىمەتىنشە، كۇدىكتىلەر الەۋمەتتىك جەلىلەر ارقىلى الەۋمەتتىك تۇرعىدان وسال توپتاعى ايەلدەردى، ونىڭ ىشىندە شەتەلدىك ازاماتشالاردى ىزدەپ تاۋىپ، ولاردىڭ دۇنيەگە جاڭا كەلگەن نارەستەلەرىن بالا اسىراپ العىسى كەلگەن ادامدارعا ساتىپ وتىرعان. بۇل ارەكەتتەر بىرنەشە جىل بويى جاسىرىن تۇردە جۇزەگە اسىپ كەلگەن.

ارنايى وپەراسيا كەزىندە ءتارتىپ ساقشىلارى ءسابيدى — ۇل بالانى — قوماقتى قاراجاتقا ساتپاق بولعان ارەكەتتى اشكەرەلەدى. كۇدىكتىلەر ءدال اقشا تاپسىرۋ كەزىندە قولعا ءتۇستى. بالا قازىرگى ۋاقىتتا مەملەكەت قورعاۋىنا الىنىپ، ارنايى مەكەمەگە ورنالاستىرىلدى.

اتالعان دەرەك بويىنشا قىلمىستىق ءىس قوزعالىپ، كۇدىكتىلەر قاماۋعا الىندى. تەرگەۋ توبى توپ مۇشەلەرىنىڭ ەلىمىزدىڭ باسقا وڭىرلەرىندەگى بايلانىستارىن دا تەكسەرىپ جاتىر.

الماتى قالالىق پوليسيا دەپارتامەنتى باسشىسىنىڭ ورىنباسارى قۋاتبەك ناۋاتوۆتىڭ ايتۋىنشا، بۇل — بالالارعا قارسى جاسالعان اسا اۋىر قىلمىس. جاۋاپكەرشىلىكتەن ەشكىم دە قۇتىلا المايدى.

ايتا كەتەيىك، 2024 جىلى پرەزيدەنت قاسىم-جومارت توقايەۆ "ادام ساۋداسىنا قارسى كۇرەس تۋرالى" زاڭعا قول قويعان ەدى. 

قىلمىستىق كودەكستە "ادام ساۋداسىمەن بايلانىستى قىلمىستار" دەگەن جاڭا ۇعىم پايدا بولدى. ولاردىڭ ىشىنە: ادام ۇرلاۋ، زاڭسىز باس بوستاندىعىنان ايىرۋ، ادام ساۋداسى جانە جەزوكشەلىككە تارتۋ كىرەدى. ادام ساۋداسىمەن كۇرەس جونىندەگى ارنايى زاڭ وسى قىلمىستىڭ قۇربانى بولعان قازاقستاندىقتاردى قورعاۋ مەن الەۋمەتتىك قولداۋدى قامتاماسىز ەتەدى.

"زاڭ العاش رەت قابىلدانىپ، ادام ساۋداسىنا قارسى كۇرەستىڭ ۇيىمدىق-قۇقىقتىق نەگىزدەرىن جان-جاقتى ايقىندايدى. ول ادام ساۋداسىنا قارسى ءىس-قيمىلدىڭ ماقساتتارى مەن مىندەتتەرىن، قاعيداتتارىن بەلگىلەيدى، سونداي-اق مەملەكەتتىك ورگانداردىڭ، جەرگىلىكتى اتقارۋشى ورگانداردىڭ جانە باسقا دا سۋبەكتىلەردىڭ ادام ساۋداسىنا قارسى ءىس-قيمىل جونىندەگى قۇزىرەتىن ايقىندايدى"، — دەلىنگەن حابارلامادا. 

اكىمشىلىك قۇقىق بۇزۋشىلىق تۋرالى كودەكس تە جاڭا باپپەن تولىقتىرىلىپ جاتىر. بالالاردى، ونىڭ ىشىندە جاڭا تۋعان نارەستەلەردى ساتۋ فاكتىلەرىنە قارسى تۇرۋ ءۇشىن 135-1 "لاۋازىمدى تۇلعالاردىڭ جاڭا تۋعان نارەستەنى تاستاپ كەتۋ، جەتىم بالالاردى جانە اتا-اناسىنىڭ قامقورلىعىنسىز قالعان بالالاردى قابىلداۋ جانە جەتكىزۋ فاكتىلەرى تۋرالى حابارلاماۋى" تۋرالى باپ پايدا بولدى.

سونداي-اق مەملەكەت باسشىسى "قازاقستاننىڭ كەيبىر زاڭنامالىق اكتىلەرىنە ادام ساۋداسىنا، بۇزاقىلىققا جانە بوتەننىڭ مۇلكىنە زيان كەلتىرۋگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا قول قويدى.

"قىلمىستىق كودەكستە ادام ۇرلاۋ، زاڭسىز باس بوستاندىعىنان ايىرۋ، ادامداردى، ونىڭ ىشىندە كامەلەتكە تولماعانداردى ساۋدالاۋ، جەزوكشەلىكپەن اينالىسۋعا تارتۋ جانە باسقا دا ءقاۋىپتى ارەكەتتەردى قامتيتىن "ادام ساۋداسىمەن بايلانىستى قىلمىستار" دەگەن جاڭا ۇعىم بەكىتىلدى. مۇنداي قىلمىستاردى جاساعانى ءۇشىن تاتۋلاسۋعا بايلانىستى قىلمىستىق جاۋاپتىلىقتان بوساتۋعا تىيىم سالىنادى"، - دەلىنگەن حابارلامادا.