Almatyda jańa týǵan sábilerdi satyp kelgen qylmystyq toptyń joly kesildi. Bul týraly QR Ishki ister ministrligi málimdedi. Arnaiy operatsiiany Ulttyq qaýipsizdik komiteti men politsiia birlesip júrgizgen, dep habarlaidy Dalanews.kz.
Tergeý málimetinshe, kúdiktiler áleýmettik jeliler arqyly áleýmettik turǵydan osal toptaǵy áielderdi, onyń ishinde sheteldik azamatshalardy izdep taýyp, olardyń dúniege jańa kelgen nárestelerin bala asyrap alǵysy kelgen adamdarǵa satyp otyrǵan. Bul áreketter birneshe jyl boiy jasyryn túrde júzege asyp kelgen.
Arnaiy operatsiia kezinde tártip saqshylary sábidi — ul balany — qomaqty qarajatqa satpaq bolǵan áreketti áshkereledi. Kúdiktiler dál aqsha tapsyrý kezinde qolǵa tústi. Bala qazirgi ýaqytta memleket qorǵaýyna alynyp, arnaiy mekemege ornalastyryldy.
Atalǵan derek boiynsha qylmystyq is qozǵalyp, kúdiktiler qamaýǵa alyndy. Tergeý toby top músheleriniń elimizdiń basqa óńirlerindegi bailanystaryn da tekserip jatyr.
Almaty qalalyq politsiia departamenti basshysynyń orynbasary Qýatbek Naýatovtyń aitýynsha, bul — balalarǵa qarsy jasalǵan asa aýyr qylmys. Jaýapkershilikten eshkim de qutyla almaidy.
Aita keteiik, 2024 jyly Prezident Qasym-Jomart Toqaev "Adam saýdasyna qarsy kúres týraly" zańǵa qol qoiǵan edi.
Qylmystyq kodekste "adam saýdasymen bailanysty qylmystar" degen jańa uǵym paida boldy. Olardyń ishine: adam urlaý, zańsyz bas bostandyǵynan aiyrý, adam saýdasy jáne jezókshelikke tartý kiredi. Adam saýdasymen kúres jónindegi arnaiy zań osy qylmystyń qurbany bolǵan qazaqstandyqtardy qorǵaý men áleýmettik qoldaýdy qamtamasyz etedi.
"Zań alǵash ret qabyldanyp, adam saýdasyna qarsy kúrestiń uiymdyq-quqyqtyq negizderin jan-jaqty aiqyndaidy. Ol adam saýdasyna qarsy is-qimyldyń maqsattary men mindetterin, qaǵidattaryn belgileidi, sondai-aq memlekettik organdardyń, jergilikti atqarýshy organdardyń jáne basqa da sýbektilerdiń adam saýdasyna qarsy is-qimyl jónindegi quzyretin aiqyndaidy", — delingen habarlamada.
Ákimshilik quqyq buzýshylyq týraly kodeks te jańa bappen tolyqtyrylyp jatyr. Balalardy, onyń ishinde jańa týǵan nárestelerdi satý faktilerine qarsy turý úshin 135-1 "Laýazymdy tulǵalardyń jańa týǵan náresteni tastap ketý, jetim balalardy jáne ata-anasynyń qamqorlyǵynsyz qalǵan balalardy qabyldaý jáne jetkizý faktileri týraly habarlamaýy" týraly bap paida boldy.
Sondai-aq memleket basshysy "Qazaqstannyń keibir zańnamalyq aktilerine adam saýdasyna, buzaqylyqqa jáne bótenniń múlkine ziian keltirýge qarsy is-qimyl máseleleri boiynsha ózgerister men tolyqtyrýlar engizý týraly" zańǵa qol qoidy.
"Qylmystyq kodekste adam urlaý, zańsyz bas bostandyǵynan aiyrý, adamdardy, onyń ishinde kámeletke tolmaǵandardy saýdalaý, jezókshelikpen ainalysýǵa tartý jáne basqa da qaýipti áreketterdi qamtityn "adam saýdasymen bailanysty qylmystar" degen jańa uǵym bekitildi. Mundai qylmystardy jasaǵany úshin tatýlasýǵa bailanysty qylmystyq jaýaptylyqtan bosatýǵa tyiym salynady", - delingen habarlamada.
