الماتىدا قوعام بەلسەندىسى ورازالى ەرجانوۆ ۇستالعانى تۋرالى اقپارات تارادى، دەپ حابارلايدى Dalanews.kz.

جۋرناليست گۇلجان ەرعالييەۆانىڭ الەۋمەتتىك جەلىدەگى جازباسىنا سۇيەنسەك، ەرجانوۆتى تۇنگى ۋاقىتتا الىپ كەتكەن.

"جۇبايىنىڭ ايتۋىنشا، ورازالى ەرجانوۆتى تۇندە الىپ كەتكەن، ۇيىندە ءتىنتۋ جۇرگىزىلگەن. وعان 10 تاۋلىككە قاماۋ جازاسى بەرىلگەن. ناقتى سەبەبى ازىرگە بەلگىسىز"، - دەپ جازدى ەرعالييەۆا.

قوعام بەلسەندىسىنىڭ ۇستالعانىن قازاقستاننىڭ حالىقارالىق ادام قۇقىقتارى جانە زاڭدىلىقتى ساقتاۋ بيۋروسى دا راستادى.

ۇيىمنىڭ مالىمەتىنشە، قازىرگى ۋاقىتتا ورازالى ەرجانوۆ - Elge Qaitaru قوعامدىق قورىنىڭ قۇرىلتايشىسى ءارى جەتەكشىسى. اتالعان قور شەتەلگە زاڭسىز شىعارىلعان اكتيۆتەردى ەلگە قايتارۋعا جاردەمدەسۋمەن اينالىسادى.

ەرجانوۆ ءار جىلدارى قازاقستان ۇلتتىق بانكى ءتوراعاسىنىڭ ورىنباسارى، قارجى ۆيسە-مينيسترى، "قازپوشتا" اق باسقارما ءتوراعاسى، حالىق بانكى ءتوراعاسىنىڭ ورىنباسارى، KEGOC ۆيسە-پرەزيدەنتى، سونداي-اق "ناۋرىز بانكىنىڭ" باسقارما ءتوراعاسى قىزمەتتەرىن اتقارعان.

ازىرگە ونى ۇستاۋعا نە سەبەپ بولعانى تۋرالى رەسمي اقپارات جاريالانعان جوق.