بۇگىن الماتى قالاسى ءماسليحاتىنىڭ كەزەكتەن تىس VII سەسسياسىندا المات قوداسبايەۆ مەملەكەتتىك قىزمەتكە اۋىسۋىنا بايلانىستى دەپۋتاتتىق وكىلەتتىگىن مەرزىمىنەن بۇرىن توقتاتتى، – دەپ حابارلايدى Dalanews.kz.

وسىلايشا، «سايلاۋ تۋرالى» زاڭعا جانە «AMANAT» پارتياسى قالالىق فيليالى ساياسي كەڭەسى بيۋروسىنىڭ شەشىمىنە سايكەس الماتى قالاسى ءماسليحاتىنىڭ دەپۋتاتتىعىنا پارتيالىق ءتىزىم بويىنشا شالبايەۆا ايگۇل دۇيسەن قىزى سايلاندى.

ايگۇل شالبايەۆا – مەديسينا عىلىمدارىنىڭ كانديداتى، اتالعان سالادا 25 جىلدان استام تاجىريبەسى بار. ول الماتى مەديسينالىق ينستيتۋتىن «ەمدىك ءىسى» ماماندىعى بويىنشا ءبىتىرىپ، ەڭبەك جولىن الماتى قالاسىنداعى تەمىرجول اۋرۋحاناسىندا دارىگەر-گينەكولوگتان باستادى. قازىرگى ۋاقىتتا ايگۇل شالبايەۆا «كەرۋەن-Medicus» كوپسالالى مەديسينالىق ورتالىعىنىڭ باسشىسى قىزمەتىن اتقارادى.

سونىمەن قاتار، سەسسيادا دەپۋتات جاندوس ءنادىروۆ دەنساۋلىق ساقتاۋ، ءبىلىم جانە جۇمىسپەن قامتۋ جونىندەگى تۇراقتى كوميسسياسىنىڭ جاڭا ءتوراعاسى بولىپ سايلاندى.