قازاقستاندا العاش رەت جاساندى ينتەللەكت تۋرالى قازاق تىلىندە جازىلعان «جاساندى ينتەللەكت الىپپەسى» كىتابىنىڭ تۇساۋكەسەرى وتەدى. ءىس-شارا 11 ناۋرىز كۇنى الماتى قالاسىنداعى Smart Point ورتالىعىندا (Smart Space زالى، بايزاقوۆ كوشەسى، 280) ساعات 14:00-دە ۇيىمداستىرىلادى.

اتالعان شارا اياسىندا كىتاپتىڭ تانىستىرىلىمى ءوتىپ، جاساندى ينتەللەكت سالاسىنداعى وزەكتى ماسەلەلەر جان-جاقتى تالقىلانادى. سونىمەن قاتار، IT، كيبەرقاۋىپسىزدىك، بيوتەحنولوگيالار جانە جاساندى ينتەللەكتتىڭ بولاشاعى تۋرالى پىكىر الماسۋ الاڭى ۇيىمداستىرىلادى.

جاساندى ينتەللەكت جانە قازاقستان

الەمدە جاساندى ينتەللەكت قارقىندى دامىپ، كوپتەگەن سالاعا اسەر ەتۋدە. 2024 جىلى جي تەحنولوگيالارىن قولدانۋ الەمدىك نارىقتا 190 ميلليارد دوللاردان استى. قازاقستان دا بۇل ۇردىستەن تىس قالماي، جاساندى ينتەللەكت باعىتىندا بەلسەندى دامىپ كەلەدى. ءجي-دى قولدانۋ ارقىلى ءوندىرىس، مەديسينا، ءبىلىم بەرۋ جانە قارجى سالالارىندا ايتارلىقتاي جەتىستىكتەرگە قول جەتكىزىلىپ جاتىر.

كىتاپتىڭ اۆتورى مەيىرجان اۋەلحان ۇلى وقۋلىقتىڭ ماڭىزدىلىعىن اتاپ ءوتىپ:

– بۇل كىتاپ – قازاق تىلىندەگى جاساندى ينتەللەكت الەمىنە العاشقى جولباسشى. ءبىز تەحنولوگيالىق وزگەرىستەر داۋىرىندە ءومىر ءسۇرىپ جاتىرمىز، سوندىقتان جاساندى ينتەللەكت نەگىزدەرىن ءبىلۋ ءاربىر ازامات ءۇشىن ماڭىزدى. كىتاپتا تەك تەوريا عانا ەمەس، ناقتى تاجىريبەلىك قولدانۋ مۇمكىندىكتەرى دە قامتىلعان، – دەدى.

بەلگىلى جۋرناليست قاينار ولجاي كىتاپ قولجازباسىمەن تانىسىپ، ونىڭ مازمۇنى مەن ساپاسىنا جوعارى باعا بەردى:

– قولجازبا وتە ساۋاتتى جازىلعان. جاساندى ينتەللەكت تۋرالى قازاقشا مالىمەت الۋ قيىن كەزدە، بۇل ەڭبەك سالاداعى ۇلكەن جەتىستىك. كىتاپتا جي ءونىمىن ۇسىناتىن كومپانيالار، نەگىزگى تەرميندەر مەن پراكتيكالىق تاپسىرمالار قامتىلعان. مۇنداي مۇقيات دايىندالعان ەڭبەكتى وقۋ – ۇلكەن عانيبەت، – دەپ پىكىر بىلدىرگەن بولاتىن.

AI-Hub Publishing – جاساندى ينتەللەكتكە ارنالعان جاڭا باسپا

AI-Hub تەك قانا جاساندى ينتەللەكت تەحنولوگيالارىن زەرتتەۋمەن عانا ەمەس، وسى سالاداعى ءبىلىم بەرۋدى دامىتۋعا دا ۇلەس قوسپاق. AI-Hub Publishing الداعى ۋاقىتتا جاساندى ينتەللەكت، IT، كيبەرقاۋىپسىزدىك جانە بيوتەحنولوگيالار تاقىرىبىندا قازاق تىلىندەگى عىلىمي-كوپشىلىك كىتاپتاردى باسىپ شىعارۋدى جوسپارلاپ وتىر.