الماتىدا ۇلتتىق كىتاپ كۇنىنە وراي العاشقى رەسپۋبليكالىق كىتاپحانالىق حاكاتون ۇيىمداستىرىلدى. بۇل ءىس-شارا Alatau Creative Hub ورتالىعىندا ءوتىپ، قازاقستاننىڭ تۇكپىر-تۇكپىرىنەن كەلگەن جاس كىتاپحاناشىلاردى بىرىكتىردى. ءىس-شارانى الماتى قالاسىنىڭ كىتاپحانالارى ۇيىمداستىردى، وعان قالا اكىمدىگى، قازاقستان رەسپۋبليكاسىنىڭ ۇلتتىق كىتاپحاناسى جانە عىلىم ورداسى قولداۋ كورسەتتى،– دەپ حابارلايدى Dalanews.kz
ەلدەگى كىتاپحانا ءىسىن جاڭعىرتۋدىڭ كوشباسشىلارى سانالاتىن الماتىلىق كىتاپحاناشىلار تاجىريبەسىن، ءبىلىمىن وزگە وڭىردەگى ارىپتەستەرىمەن بولىسە باستادى. حاكاتون – تاجىريبە الماسۋعا، جاڭا قىزمەت تۇرلەرىن تالقىلاۋعا جانە كىتاپحانا سالاسىنا سيفرلىق تەحنولوگيا ەنگىزۋ ماسەلەسىن قاراۋعا ارنالعان ماڭىزدى الاڭعا اينالدى.
بۇگىندە الماتى كىتاپحانالاردى جاڭعىرتۋدا جەتەكشى ورىندا. مۇندا تاۋلىك بويى جۇمىس ىستەيتىن 24/7 كىتاپحانالار، اۆتونومدى كىتاپحانالار، RFID جۇيەسى جانە سيفرلىق وقۋ زالدارى جۇمىس ىستەيدى. بۇل باستامالاردى مەملەكەت باسشىسى قاسىم-جومارت توقايەۆ تاراپىنان جوعارى باعالاپ، وزگە ءوڭىر اكىمدەرىن مەگاپوليستىڭ وزىق تاجىريبەسىن قابىلداۋعا شاقىرعان بولاتىن.
حاكاتون قاتىسۋشىلارى كىتاپحانا سالاسىن دامىتۋعا باعىتتالعان جوبالار مەن يدەياسىن تانىستىردى. الماتىلىق جاس ماماندار قالا اكىمدىگىنىڭ قولداۋىمەن وڭتۇستىك كورەيا، شۆەيساريا، گەرمانيا، فينليانديا، ەستونيا جانە شۆەسيا ەلدەرىندە حالىقارالىق تاعىلىمدامادان ءوتىپ، شەتەلدىك ۇزدىك تاجىريبە مەن ولاردى جەرگىلىكتى جاعدايعا بەيىمدەۋ ءتاسىلىن ايتتى.
«بۇگىنگى كىتاپحانالىق حاكاتون جوعارى دەڭگەيدە ءوتتى. ەلدىڭ تۇكپىر-تۇكپىرىنەن كەلگەن ماماندار كەرەمەت يدەيا مەن تىڭ كوزقاراس ۇسىندى. ءبىز ارىپتەستەرىمىزدىڭ جوباسىنان شابىت الىپ، تاجىريبەمىزدى قۋانا بولىستىك»، – دەدى باتىس قازاقستان وبلىسى، بىرلىك اۋىلىنىڭ كىتاپحاناشىسى، حاكاتون قاتىسۋشىسى گۇلباقىت دۇيسەن.
العاشقى حاكاتون جاس كىتاپحاناشىلاردىڭ كاسىبي دامۋى جولىنداعى ماڭىزدى قادام عانا ەمەس، سونىمەن قاتار، قازاقستان كىتاپحانالارىنىڭ جاڭعىرۋعا، يننوۆاسيا ەنگىزۋگە جانە ەلدىڭ مادەني-وقۋ ومىرىندەگى ورنىن نىعايتۋعا دەگەن ۇمتىلىسىنىڭ جارقىن دالەلى بولدى.
ايتا كەتەيىك، بۇگىندە الماتىدا قالا اكىمدىگىنە قاراستى 30-عا جۋىق كىتاپحانا جۇمىس ىستەيدى، ونىڭ 95%-ى تولىقتاي جاڭعىرتۋدان ءوتىپ، ماتەريالدىق-تەحنيكالىق بازاسى جاڭارتىلعان. بۇل كىتاپحانالارعا زاماناۋي تالاپتارعا ساي بولۋعا عانا ەمەس، وقىرماندارعا قىزمەت كورسەتۋدىڭ يننوۆاسيالىق فورماتىن ەنگىزۋگە مۇمكىندىك بەرەدى. ايتا كەتەرلىگى، جىل سايىن قالا كىتاپحانالارىندا 3 ميلليوننان استام كەلۋشى تىركەلەدى.
