الماتىدا سوت شەشىمى بويىنشا ەكى قاباتتى تاۋنحاۋس بۇزىلدى. بۇل تۋرالى الماتىنىڭ قالا قۇرىلىسىن باقىلاۋ باسقارماسى ءمالىم ەتتى، دەپ حابارلايدى Dalanews.kz
باسقارمانىڭ حابارلاۋىنشا، اسقارتاۋ شاعىن اۋدانى جانسايا كوشەسى 17ب مەكەنجايداعى قۇلىپتالعان ءۇي بۇزىلدى.
بۇرىن جوسپاردان تىس تەكسەرۋ ناتيجەلەرى بويىنشا مەنشىك يەسىنە قاتىستى رۇقسات قۇجاتتارى تولىق پاكەتىنىڭ بولماۋىنا بايلانىستى اكىمشىلىك شارالار قابىلداندى جانە بۇزۋشىلىقتاردى جويۋعا نۇسقاما بەرىلدى.
نۇسقاما مەرزىمى اياقتالعاننان كەيىن باسقارما الماتى قالاسىنىڭ بوستاندىق اۋداندىق سوتىنا بۇزۋعا تالاپ ارىز بەردى. 2024 جىلعى 2 مامىردا الماتى قالالىق سوتىنىڭ قاۋلىسىمەن ءبىرىنشى ساتىداعى سوت بۇزۋ تۋرالى شەشىم وزگەرىسسىز قالدى. كەيىن ادىلەت دەپارتامەنتىندە اتقارۋشىلىق ءىس قوزعالدى.
نىساندى بولشەكتەۋ سوت ورىنداۋشىلارىنىڭ قاتىسۋىمەن باستالدى.
ەستەرىڭىزگە سالا كەتەيىك، الماتى اكىمى ەربولات دوسايەۆتىڭ قۇرىلىسقا باقىلاۋدى كۇشەيتۋ جونىندەگى تاپسىرماسى اياسىندا 2023 جىلدىڭ باسىنان بەرى 72 زاڭسىز نىسان، ونىڭ ىشىندە «مەچتا»، KHAN جانە باسقا دا تۇرعىن ءۇي كەشەندەرى تولىعىمەن نەمەسە ءىشىنارا بۇزىلعان.
