الماتىدا «تازا قازاقستان» باعدارلاماسى اياسىندا كولىكتىڭ ەكولوگيالىق تازا تۇرلەرى ءۇشىن ينفراقۇرىلىمدى دامىتۋ جالعاسىپ جاتىر. بيىل قالادا 20 شاقىرىمعا جۋىق ۆەلوجول سالۋ جوسپارلانىپ وتىر،– دەپ حابارلايدى Dalanews.kz
قالالىق موبيلدىلىك باسقارماسىنىڭ حابارلاۋىنشا، 2024 جىلى قالادا سايىن - موڭكە بي جولايرىعىن سالۋ اياسىندا 2،4 شاقىرىم ۆەلوجول جابدىقتالدى.
«اعىمداعى جىلى اباي داڭعىلىن قالا شەكاراسىنا دەيىن جانە ساين كوشەسىن رىسقۇلوۆ داڭعىلىنان موڭكە بي كوشەسىنە دەيىن ۇزارتۋ اياسىندا 7،2 كم جايلاستىرۋ جوسپارلانۋدا. سونداي-اق، رايىمبەك باتىر داڭعىلى بويىنشا BRT جەلىسىن سالۋ اياسىندا شامامەن 15 كم-دى جابدىقتاۋ جوسپارلانۋدا. جالپى، ۆەلوينفراقۇرىلىمدى جۇيەلى دامىتۋ 2030 جىلعا دەيىنگى كولىك قاڭقاسىنىڭ ماستەر-جوسپارىندا كوزدەلگەن»، - دەپ اتاپ ءوتتى باسقارما.
بۇگىنگى تاڭدا قالادا 89 كم ۆەلوينفراقۇرىلىم (ۆەلوجولاقتار – 25،15 كم، ۆەلوجولدار – 63،8 كم)، 73 باعدارشام نىسانى، ۆەلوپايدالانۋشىلارعا قىزمەت كورسەتۋگە باعدارلانعان 1025 جول بەلگىسى جابدىقتالعان.
ايتا كەتۋ كەرەك، ۆەلوجولدار جەلىسىن دامىتۋ تۇرعىندارعا بالاما جولداردى ۇسىنا وتىرىپ، قالالىق ينفراقۇرىلىمدى جاقسارتۋعا ىقپال ەتەدى. بۇل اۋانىڭ گازدانۋ دەڭگەيىن تومەندەتىپ قانا قويمايدى، سونىمەن قاتار جولدارداعى كولىكتەردىڭ سانىن ازايتادى، قالاداعى جالپى كولىك جاعدايىن جاقسارتا وتىرىپ، كەپتەلىستەردى ازايتۋعا مۇمكىندىك بەرەدى.
