الماتىداعى جەر سىلكىنىسىنەن كەيىن “زەردەلى” شاعىن اۋدانىنىڭ تۇرعىندارى ۇرەيگە بوي الدىرىپ، ۇيلەرىنە ورالۋدان قورقىپ وتىر، دەپ حابارلايدى Dalanews.kz.
2013-2015 جىلدارى الماتىدا “زەردەلى” شاعىن اۋدانى قۇرىلدى. تۇرعىنداردىڭ مالىمدەۋىنشە، از قامتىلعان جانە الەۋمەتتىك جاعىنان قورعالماعان ازاماتتارعا ارنالعان اتالمىش ۇيلەردەن ءقاۋىپ ءتونىپ تۇر.
وتكەن جىلى تۇرعىنداردى قورعاۋ ماقساتىندا ارنايى فيليال كومەككە كەلگەن. وكىنىشكە قاراي، جاعداي جاقسارۋدىڭ ورىنىنا، كەرىسىنشە كەلەڭسىز ماسەلەلەر ۋشىعا تۇسكەن. ماسەلەن، #78 ءۇيدىڭ كىرەبەرىس جەرىنىڭ توبەسى قاتتى بۇلىنگەن. سونىمەن قاتار ءۇي قابىرعالارىندا جارىقشاقتار پايدا بولىپ، تۇرعىنداردىڭ ۇرەيىن تۋدىرعان.
الايدا 23 قاڭتار “زەردەلى” شاعىن اۋدانىنىڭ تۇرعىندارى ناعىز سىناقتى باستان وتكەردى. سەبەبى جاعدايى سىر بەرىپ تۇرعان ۇيلەر جەر سىلكىنىسىنەن كەيىن اۋدان جۇرتشىلىعىن ابىگەرگە سالىپ، زارە-قۇتىن قاشىرعان. بۇل ايماقتا 114 ءۇي ورىن تەپكەن. ناقتىراق ايتساق مىڭنان استام ادام ءومىر سۇرەدى. ءزىلزالا ورىن العان ءتۇنى كوپشىلىگى جاقىن ماڭداعى مەكتەپتەردە تۇنەگەن. ءبىراق بۇل وقيعادان كەيىن دە اۋدان جۇرتشىلىعىنىڭ جاعدايىنا ەشكىم نازار اۋدارماعان.
تۇرعىنداردىڭ ايتۋىنشا، جەر سىلكىنىسى سالدارىنان ۇيلەردىڭ 25 پايىزىنا زاقىم كەلگەن. كىرەبەرىس پەن پاتەر ىشىندە جارىقتار پايدا بولعان. قازىرگى تاڭدا قيىندىققا تاپ بولعان بۇل ادامدار نازاردان تىس قالعانىن ايتىپ، دابىل قاعۋدا.
وسى تۇستا قازاقستان رەسپۋبليكاسى پرەزيدەنتىنىڭ الماتىعا جۇمىس ساپارىن ەسكەرە وتىرىپ، تۇرعىندار مەملەكەت باسشىسىنا زارداپ شەككەن شاعىن اۋدانعا بارىپ، ءوز ماسەلەسى بويىنشا دەرەۋ شەشىم قابىلداۋدى ءوتىنىپ وتىر.
ەسكە سالايىق، 23 قاڭتاردا الماتىدا جەر سىلكىنىسى بولدى. توتەنشە جاعدايلار دەپارتامەنتىنىڭ مالىمەتىنشە، جەر استى ءدۇمپۋىنىڭ ەپيسەنترى الماتىنىڭ وڭتۇستىك-شىعىسىندا، 264 شاقىرىم جەردە تىركەلدى. ماگنيتۋداسى – 6،7. بۇدان سوڭ تۇرعىندار قالادا تاعى دا بىرنەشە جەر سىلكىنىسى سەزىلگەنىن حابارلادى. ال تجد دەرەگىنە ساي، الداعى ۋاقىتتا جويقىن جەر سىلكىنىسى بولمايدى.
