الماتىدا قوعامدىق كولىكتىڭ جولاقىسىن كوتەرۋ جوسپارلانىپ وتىر، - دەپ حابارلايدى Dalanews.kz.
الماتىدا قوعامدىق كولىكتە جول ءجۇرۋ اقىسى 20 تەڭگەگە كوتەرىلۋى مۇمكىن. قالا اكىمدىگىنىڭ قاۋلى جوباسى قوعاممەن تالقىلانۋ ءۇشىن "اشىق نقا" جاريالاندى. قالالىق موبيلدىلىك باسقارماسى وكىلدەرى 80 تەڭگەلىك تاريف 2011 جىلدان بەرى وزگەرمەگەنىن جانە بىلتىر عانا 20 تەڭگەگە وسكەنىن ايتى. ءقازىر الماتىدا قوعامدىق كولىكتەگى ءتاريفتىڭ قۇنى قولما-قول اقشاسىز تاسىلمەن تولەگەن كەزدە 100 تەڭگە، ال قولما-قول تولەگەن كەزدە 200 تەڭگە.
ۆەدومستۆو وكىلدەرى بيىل قوعامدىق كولىكتە جول ءجۇرۋ ءۇشىن ورتاشا تاريف 310 تەڭگە، ال كەيبىر مارشرۋتتا 400 تەڭگەگە جەتەتىنىن ايتتى. وسىعان بايلانىستى جىل سايىن تاسىمالداۋشىلارعا تولەنەتىن سۋبسيديا مولشەرى ءوسىپ جاتىر. 2023 جىلى 68،7 ميلليارد تەڭگە بولىنسە، 2024 جىلى سۋبسيديانىڭ بولجامدى سوماسى 97،3 ميلليارد تەڭگەگە دەيىن ءوستى. وسىلايشا، قازىرگى تاريف بويىنشا سۋبسيديالاۋ مولشەرى ۇنەمى ءوسىپ وتىرادى، بۇل جەرگىلىكتى بيۋدجەت ءۇشىن شامادان تىس بولۋى مۇمكىن.
"قالا تاسىمالداۋشىلارى قولدانىستاعى تاريف تاسىمالداۋشىلاردىڭ اۆتوبۋس ساتىپ الۋعا، جاڭارتۋعا جانە ۋاقىتىلى قىزمەت كورسەتۋگە، سونداي-اق، جۇرگىزۋشىلەردىڭ جالاقىسىن كوتەرۋگە جۇمساعان شىعىندى وتەمەيتىنىن بىرنەشە رەت مالىمدەدى. تاسىمالداۋشىلارعا جانە جەرگىلىكتى بيۋدجەتكە جۇكتەمەنى ءىشىنارا ازايتۋ ماقساتىندا قالالىق قاتىناستاردا جولاۋشىلار مەن باگاجدى اۆتوموبيلمەن تۇراقتى تاسىمالداۋعا تاريف بەلگىلەۋ تۋرالى قالا اكىمدىگى قاۋلىسىنىڭ جوباسى دايىندالدى. جوبا جول ءجۇرۋ ءتاريفىن 120 تەڭگەگە دەيىن كوتەرۋدى كوزدەيدى. تيىسىنشە، ازاماتتاردىڭ جەڭىلدەتىلگەن ساناتتارى ءۇشىن جول ءجۇرۋ قۇنى ءتاريفتىڭ 50 پايىزى بولادى"، - دەپ جازىلعان باسقارما حابارلاماسىندا.
سونىمەن قاتار، قوعامدىق كولىكتە جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا جول ءجۇرۋ اقىسىن قولما-قول اقشامەن تولەۋدى جويۋ كوزدەلگەن. بۇل اۆتوبۋس جۇرگىزۋشىسىنە كولىك قۇرالىن باسقارۋعا جانە اقشا جيناۋعا الاڭداماۋعا مۇمكىندىك بەرەدى.
