قما الماتى قالاسى بويىنشا دەپارتامەنتى «Warner Bros» قارجى پيراميداسىن قۇرۋ جانە ونى باسقارۋ فاكتىسى بويىنشا تەرگەۋدى اياقتادى، دەپ حابارلايدى Dalanews.kz.

قارجى پيراميداسىنىڭ ۇيىمداستىرۋشىلارى ازاماتتاردى جوعارى تابىس ۋادەسىمەن ينۆەستيسيا سالۋعا ۇگىتتەگەن.

جوباعا زاڭدى كورىنىس بەرۋى ءۇشىن وسى ىسكە ەش قاتىسى جوق تانىمال گولليۆۋدتىق كومپانياسىنىڭ اتاۋىن پايدالانعان. قاتىسۋشىلارعا فيلم ترەيلەرلەرىن قاراۋ جانە جاڭا سالىمشىلاردى تارتۋ ارقىلى تابىس تابۋ ۇسىنىلعان.

جوبا 9 دەڭگەيدەن تۇرعان، ورتاشا سالىم مولشەرى 225 مىڭ تەڭگە، تولەمدەر تەك USDT كريپتوۆاليۋتاسىندا قابىلدانعان.

سحەمانى ىلگەرىلەتۋ ءۇشىن الەۋمەتتىك جەلىلەر مەن مەسسەندجەرلەر بەلسەندى قولدانىلعان. ادمينيستراتورلار ارنايى چاتتار قۇرىپ، وقىتۋ جۇرگىزىپ، نۇسقاۋلىقتار مەن بەينەروليكتەر تاراتقان، جىلدام تابىس پەن كريپتوۆاليۋتا تۇرىندە سىياقى ۋادە ەتكەن.

تەرگەۋ بارىسىندا سالىمشىلاردان جينالعان جانە اۋدارىلعان قاراجاتتى ساقتاۋ ءۇشىن پايدالانىلعان كريپتوامياندار انىقتالدى.

سوت سانكسياسىمەن جالپى سوماسى 3،8 ملن USDT كولەمىندەگى كريپتواكتيۆتەرگە تىيىم سالىندى.

سوت ۇكىمىمەن ۇيىمداستىرۋشىعا 5 جىل باس بوستاندىعىنان ايىرۋ جازاسى تاعايىندالدى.

سونىمەن قاتار، سوت 40 جابىرلەنۋشىنىڭ ازاماتتىق تالاپتارىن قاناعاتتاندىرىپ، ولاردىڭ زالالى تىيىم سالىنعان كريپتواكتيۆتەر ەسەبىنەن وتەلەتىن بولدى.

ۇكىم زاڭدى كۇشىنە ەنگەن جوق.