الماتىنىڭ جەرگىلىكتى بيۋدجەتى العاش رەت 2023 جىلى سيفرلاندىرىلدى، دەپ حابارلايدى Dalanews.kz.
وتكەن جىلى الماتىنىڭ جەرگىلىكتى بيۋدجەتىندەگى تۇسىمدەر 1،6 ترلن تەڭگەدەن استى، بۇل 2022 جىلمەن سالىستىرعاندا 17% - عا ارتىق. بۇل تۋرالى الماتى ءماسليحاتىنىڭ كەزەكتى سەسسياسىندا تەكسەرۋ كوميسسياسىنىڭ ءتوراعاسى التاي بەردىقۇلوۆ قالانىڭ 2023 جىلعى جەرگىلىكتى بيۋدجەتىنىڭ اتقارىلۋىنا وڭ باعا بەرىپ، حابارلادى.ح
سالىق تۇسىمدەرىنەن تۇسكەن كىرىستەر 313،3 ملرد تەڭگەگە جوسپارلى كورسەتكىشتى اسىرا ورىنداۋمەن 1،4 ترلن تەڭگەنى قۇرادى. بۇل 2022 جىلعى سالىق تۇسىمدەرى بويىنشا كورسەتكىشتەن 30% - عا ارتىق، دەپ اتاپ ءوتتى ا.بەردىقۇلوۆ.
ونىڭ ايتۋىنشا، 2023 جىلى سالىقتىق ەمەس تۇسىمدەر 28،5 ملرد تەڭگەنى قۇرادى. جوسپاردى اسىرا ورىنداۋ 82% نەمەسە 12،8 ملرد تەڭگەنى قۇرادى.
"2023 جىلى تەكسەرۋ كوميسسياسى الماتى اكىمدىگىمەن بىرلەسىپ العاش رەت جەرگىلىكتى بيۋدجەت ناقتىلاندى جانە سيفرلاندىرىلدى. كىرىستەر مەن شىعىستار جيناقتالدى، بيۋدجەت كوزدەر بويىنشا سەگمەنتتەلدى، بيۋدجەتتىك باعدارلامالاردىڭ اكىمشىلەرىنە، تۇرلەرىنە قاراي ءبولىندى. 2023 جىلعا ارنالعان بيۋدجەتتىك جوسپارلاۋ بويىنشا قۇرىلعان سيفرلاندىرىلعان بازا 2024 جىلدار بيۋدجەتتىك ينۆەستيسيالىق جوبالاردى قارجىلاندىرۋ بويىنشا تاريحي جانە بولجامدى دەرەكتەرگە ورتالىقتاندىرۋ ارقىلى قول جەتكىزۋگە مۇمكىندىك بەرەدى. بۇل تۇزەتۋلەر مەن ناقتىلاۋلاردى ەسكەرە وتىرىپ، بيۋدجەتتىڭ اتقارىلۋ بارىسىنا الدىن الا باقىلاۋ جۇرگىزۋدى قامتاماسىز ەتەدى"، - دەدى ا.بەردىقۇلوۆ.
تەكسەرۋ كوميسسياسىنىڭ ءتوراعاسى الماتىنىڭ بيۋدجەتى الەۋمەتتىك باعدارلانعانىن جانە حالىقتىڭ ءال-اۋقاتىنا، ءومىر ءسۇرۋ ساپاسىن جاقسارتۋعا باعىتتالعانىن اتاپ ءوتتى.
