الماتىداعى ازىق-تۇلىك دۇكەنىنىڭ يەسى يۋسۋف گۋسەينوۆ 12 جىل بويى ءوز بيزنەسىنىڭ اينالاسىن جاسىل جەلەككە مالىندىرىپ، اينالاسىن اسەم باققا اينالدىرىپ كەلەدى. قالاعا دەگەن سۇيىسپەنشىلىكتەن شابىتتانىپ، ول دۇكەن عيماراتىنىڭ ارتىنداعى قاراۋسىز قالعان جەردى گۇلدەنگەن وازيسكە اينالدىرىپ، تۋيا اعاشىن، راۋشان گۇلىن وتىرعىزۋدى ادەتكە اينالدىرعان، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.

الماتى قالا اكىمدىگى يۋسۋف مىرزانىڭ «تۇراتىن، جۇمىس ىستەيتىن جەرىڭدى قۇرمەتتە ءارى باعالا» دەگەن باستاماسىنا قولداۋ ءبىلدىردى.

بۇگىن «تازا قازاقستان» باعدارلاماسىنىڭ ارقاسىندا 2 مىڭعا جۋىق الماتىلىق كاسىپكەر كورشىلەس اۋماقتاردى كۇتىپ ۇستاۋ بويىنشا مىندەتتەمەلەردى ءوز موينىنا الىپ، اباتتاندىرۋ پاسپورتتارىنا قول قويدى.

الماتىدا اباتتاندىرۋ نىساندارىن پاسپورتتاۋ 6 مىڭنان استام نىساندى قامتيدى جانە 2025 جىلدىڭ ءساۋىر ايىندا اياقتالادى. بۇل پروسەسس ءۇش كەزەڭنەن تۇرادى جانە ماگيسترالدىق كوشەلەر مەن قالالىق جانە اۋداندىق ماڭىزى بار كوشەلەردەگى وبەكتىلەرگە اسەر ەتەدى.

وسىلايشا يۋسۋف گۋسەينوۆتىڭ ومىرلىك ۇستانىمى مىڭداعان الماتىلىققا ومىرلىك ساباق بولۋدا.   

– عيماراتتىڭ ارتىندا قوقىس كونتەينەرلەرى ورنالاسقان قاراۋسىز قالعان اۋماق بولاتىن. سول جەردە ۇلكەن شۇڭقىر بار ەدى. كونتەينەرلەردى الىپ تاستادى، سودان كەيىن مەن توپىراق تاسىپ، اۋماقتى تەگىستەپ، كوشەتتەر مەن گۇلدەردى ەگە باستادىم، – دەيدى يۋسۋف گۋسەينوۆ.

سونىمەن قاتار، ول شەڭبەر بويىمەن ارشا مەن راۋشان گۇلدەرىن وتىرعىزىپ، اۋماقتى گۇلمەن كومكەرگەنىن دە ايتا كەتۋىمىز كەرەك. بىرنەشە جىل بۇرىن يۋسۋف مىرزا جول بويىنداعى گازونمەن اينالىسۋدى باستادى، ال اۋداندىق اكىمدىك قۋراعان اعاشتاردى الىپ تاستادى.

– اكەم ءارقاشان مەنى تۇرعان جانە جۇمىس ىستەيتىن جەرىڭدە ءتارتىپ پەن سۇلۋلىق بولۋى كەرەك دەپ ۇيرەتەتىن. ادامدار اينالا تازا جانە ۇقىپتى بولعاندا، وزدەرىن جاقسى سەزىنەدى، – دەيدى ءيۋسۋفتىڭ ۇلى ەلنۇر گۋسەينوۆ.

بۇگىندە الماتىدا نىسانداردى پاسپورتتاۋ ءۇش كەزەڭگە ءبولىنىپ ىسكە اسۋدا.  جاقىندا باستالعان ءبىرىنشى كەزەڭدە ماگيسترالدى كوشەلەردەگى 1،5 مىڭنان استام نىسان قامتىلدى. ەكىنشى كەزەڭدە قالالىق ماڭىزى بار كوشەلەردەگى نىساندار پاسپورتتالماقشى، ال ءۇشىنشى كەزەڭدە اۋداندىق ماڭىزى بار كوشەلەردەگى نىساندار اباتتاندىرۋ پاسپورتتارىنا يە بولادى.

بۇعان دەيىن الماتىدا رەسپۋبليكالىق «تازا قازاقستان» باعدارلاماسى مەن قالالىق «الماتى – ءبىزدىڭ ورتاق ءۇيىمىز» جوباسى اياسىندا ەكولوگيالىق جاعدايدى جاقسارتۋ مەن مەگاپوليستى كوگالداندىرۋعا باعىتتالعان اۋقىمدى ەكواكسيا وتكەن بولاتىن. «جارقىن كۇز» دەپ اتالاتىن بۇل ناۋقانعا قالاداعى بارلىق 8 اۋداننىڭ تۇرعىندارى بەلسەندى قاتىسىپ، كوشەلەردى تازالاۋ جانە اعاش وتىرعىزۋ جۇمىستارىن جۇرگىزدى.