كورەيا رەسپۋبليكاسىنىڭ استاناسى سەۋلدە 5-8 ماۋسىم ارالىعىندا ازياداعى ەڭ ءىرى تۋريستىك كورمەلەردىڭ ءبىرى — Seoul International Tourism Fair (SITF 2025) ءوتتى،- دەپ حابارلايدى Dalanews.kz
كورمەگە 800-گە جۋىق تۋريستىك سالا وكىلدەرى، سونىڭ ىشىندە ۇلتتىق تۋريستىك اگەنتتىكتەر، تۋروپەراتورلار جانە 70 ەلدىڭ قوناق ءۇي جەلىلەرى قاتىستى.
الماتى ستەندى كەلۋشىلەر مەن ساراپشىلاردىڭ نازارىن ەرەكشە اۋداردى، ال كورمە سوڭىندا «SITF 2025 ستەندىنىڭ ۇزدىك ديزاينى» قۇرمەتتى ماراپاتىنا يە بولدى.
كورمە قوناقتارى دومبىراشىلاردىڭ ونەرىن، قولدانبالى ونەر شەبەرحانالارىن، قازاق ۇلتتىق كيىمدەرى قويىلعان فوتو جانە گاسترونوميالىق ايماقتاردى قامتيتىن باي ينتەراكتيۆتى باعدارلامانىڭ ارقاسىندا الماتىنىڭ قازاق مادەنيەتى مەن رۋحىنىڭ اۋانىن تاماشالاي الدى.
ستەندتىڭ جەكە ەرەكشەلىگى يممەرسيۆتى ماركەتينگتى قولدانۋ بولدى، وندا كەلۋشىلەر VR-كوزىلدىرىك ارقىلى الماتىعا ۆيرتۋالدى ساياحات جاساي الادى.
«SITF 2025 كورمەسىنە قاتىسۋ الماتىنى وڭتۇستىك كورەيا مەن حالىقارالىق نارىقتا بىرەگەي تۋريستىك باعىت رەتىندە ىلگەرىلەتۋدەگى ماڭىزدى قادام بولدى. ءىس - شارا بارىسىندا قازاقستاندىق جانە شەتەلدىك تۋروپەراتورلار اراسىندا B2B كەزدەسۋلەر وتكىزىلىپ، قالامىزعا 21 مىڭعا جۋىق ءتۋريستتى تارتۋدى كوزدەيتىن ىنتىماقتاستىق تۋرالى 30 كەلىسىمشارتقا قويىلدى»، - دەپ اتاپ ءوتتى الماتى قالاسى تۋريزم باسقارماسىنىڭ تالداۋ جانە ستراتەگيالىق جوسپارلاۋ ءبولىمىنىڭ باسشىسى ماقپال ءابدىقادىر.
ءوز كەزەگىندە كورمە قوناقتارى الماتىعا ۇلكەن قىزىعۋشىلىق تانىتتى.
«ءبىز ءۇشىن ورتالىق ازياداعى وسى اسەم قالا وتە قىزىقتى تۋريستىك باعىت بولىپ تابىلادى. مەنىڭ ويىمشا، الماتى-تاۋلاردىڭ ەتەگىندەگى بىرەگەي قالا ءارى ونىڭ زاماناۋي دامۋى ۇلتتىق رۋحقا وتە باي ەكەن. ءبىر كەزدە وسى ارۋ قالادا بولامىن دەپ ۇمىتتەنەمىن»، - دەپ ءوز ويىمەن ءبولىستى سەۋل تۇرعىنى كيم دجيۋن.
ايتا كەتەيىك، وڭتۇستىك كورەيالىق تۋريستەردىڭ الماتىعا دەگەن قىزىعۋشىلىعى جىل سايىن ارتىپ كەلەدى: 2024 جىلى كورەيا رەسپۋبليكاسىنان كەلگەن تۋريستەر سانى 20114 ادامعا دەيىن ۇلعايدى، بۇل 2023 جىلمەن سالىستىرعاندا 3،2%-عا كوپ.
بۇل الماتىنىڭ تۋريستىك تارتىمدىلىعىن نىعايتۋ جانە الەمنىڭ ءار تۇكپىرىنەن، سونىڭ ىشىندە كورەيا رەسپۋبليكاسىنان كەلەتىندەردىڭ گەوگرافياسىن كەڭەيتۋ جونىندەگى ماركەتينگتىك ناۋقاننىڭ نەگىزگى ەلەمەنتتەرىنىڭ ءبىرى.
