الماتى قالاسىنىڭ الاتاۋ اۋدانىندا قالا اكىمى ەربولات دوسايەۆتىڭ تاپسىرماسى بويىنشا جانە جەرگىلىكتى تۇرعىنداردىڭ وتىنىشتەرىن ەسكەرە وتىرىپ، العاشقى مەديسينالىق-سانيتارلىق كومەك ورتالىعىنىڭ (مساك) جاڭا عيماراتى اشىلدى،- دەپ حابارلايدى Dalanews.kz
جاڭا بەس قاباتتى مساك ورتالىعى №25 قالالىق ەمحانانىڭ فيليالى جانە ول جاقىن ماڭداعى شاعىن اۋدانداردىڭ 18 مىڭ تۇرعىنىنا قىزمەت كورسەتۋگە ەسەپتەلگەن. ورتالىقتىڭ جوبالىق قۋاتى ءبىر اۋىسىمدا 200 كەلۋشىنى قۇرايدى. عيماراتتا ءتورت بولىمشە ورنالاسقان: ۋچاسكەلىك قىزمەت، مامانداندىرىلعان مەديسينالىق كومەك بولىمشەسى، گينەكولوگيالىق بولىمشە جانە كلينيكالىق-دياگنوستيكالىق بولىمشە. ورتالىق ۋلترادىبىستىق، رەنتگەن، اۋديوگرامما، سپيروگرافيا، كولپوسكوپيا جانە ەكگ اپپاراتتارىن قوسا العاندا، زاماناۋي مەديسينالىق جابدىقتارمەن جابدىقتالعان.
بۇعان دەيىن قاراسۋ شاعىن اۋدانىنىڭ 18 مىڭنان استام تۇرعىنى №21 ەمحانا فيليالىنىڭ ەسكى عيماراتىندا مەديسينالىق كومەك العان، وندا امبۋلاتوريا نەبارى 160 شارشى مەتر اۋماقتا ورنالاسقان. جاڭا ورتالىقتىڭ اشىلۋى اۋدان تۇرعىندارىنا قولايلى جاعدايدا ساپالى جانە ۋاقتىلى مەديسينالىق كومەك الۋعا مۇمكىندىك بەرەدى.
قاراسۋ شاعىن اۋدانىنىڭ تۇرعىنى جاڭا دارىگەرلىك امبۋلاتوريا اشقانى ءۇشىن العىسىن ءبىلدىردى.
«ءقازىر بىزدە ءۇيدىڭ جانىندا وسىنداي زاماناۋي مەديسينالىق مەكەمەنىڭ بولعانى وتە جاقسى. ەندى ءبارى قولجەتىمدى. قالا باسشىلىعىنا ءبىزدىڭ قاجەتتىلىكتەرىمىزگە نازار اۋدارعانىڭىز جانە تۇرعىنداردىڭ دەنساۋلىعىنا قامقورلىق جاساعانىڭىز ءۇشىن راحمەت ايتامىز»، - دەپ ءوز ويىمەن ءبولىستى ول.
پاسيەنتتەرگە ىڭعايلى بولۋ ءۇشىن جاڭا عيماراتتا بارلىق قاجەتتى جاعدايلار جاسالعان، سونىڭ ىشىندە حالىقتىڭ از قوزعالاتىن توپتارى (اقت) ءۇشىن قولجەتىمدىلىك. عيمارات ىشىندە بارلىق قاباتتارعا كىرۋدى قامتاماسىز ەتەتىن جۇك-جولاۋشىلار ءليفتى، سونداي-اق ىلەسپە باسپالداقتار بار. كىرە بەرىستە مۇمكىندىگى شەكتەۋلى جاندارعا عيماراتقا كەدەرگىسىز كىرۋگە مۇمكىندىك بەرەتىن پاندۋستار ورناتىلعان. سونىمەن قاتار، ەكى قاباتتا اقت قاجەتتىلىكتەرىنە بەيىمدەلگەن مامانداندىرىلعان جۋىناتىن بولمەلەر جابدىقتالعان، بۇل مەديسينالىق قىزمەتتەردى پاسيەنتتەردىڭ بارلىق ساناتتارى ءۇشىن قولجەتىمدى ەتەدى.
ايتا كەتەيىك، وتكەن جىلى الماتىدا ءۇش وتباسىلىق-دارىگەرلىك امبۋلاتوريا پايدالانۋعا بەرىلدى: نۇرشاشقان شاعىن اۋدانىندا (اۋىسىمىنا 100 كەلۋشىگە)، مامىر شاعىن اۋدانىندا (200 كەلۋشىگە) جانە كەمەل شاعىن اۋدانىندا (اۋىسىمىنا 200 كەلۋشىگە)، سونداي-اق بالالار شۇعىل مەديسينالىق كومەك ورتالىعىنىڭ جاڭا قابىلداۋ بولمەسى.
بۇگىندە سايالى شاعىن اۋدانىندا ەمحانا، ايباسوۆ كوشەسىندەگى مساك ورتالىعى جانە №4 جەدەل جاردەم قوسالقى ستانسياسىنىڭ قۇرىلىسى جۇرگىزىلۋدە.
سونداي-اق، №4 قالالىق كلينيكالىق اۋرۋحانانى، بوستاندىق جانە ناۋرىزباي اۋداندارىنداعى ەمحانالاردى رەكونسترۋكسيالاۋ جوبالارىنا وڭ ساراپتاما بەرىلدى.
وتكەن جىلى دەنساۋلىق ساقتاۋ مينيسترلىگىمەن بىرلەسىپ، 2030 جىلعا دەيىن مەديسينالىق وبەكتىلەردى سالۋ مەن جاڭعىرتۋدىڭ كەزەڭ-كەزەڭدىك جوسپارى بەكىتىلدى، ول 32 جاڭا دەنساۋلىق ساقتاۋ وبەكتىلەرىن سالۋدى جانە 14 قولدانىستاعى وبەكتىلەردى جاڭارتۋدى كوزدەيدى.
