OTM Mumbai 2026: الماتى قالالىق ءتۋريزمنىڭ حالىقارالىق دەڭگەيدەگى كوشباسشىسى رەتىندە تانىلدى، دەپ حابارلايدى Dalanews.kz

الماتى قالاسى ازياداعى ەڭ ءىرى حالىقارالىق تۋريستىك كورمەلەردىڭ ءبىرى OTM Mumbai 2026 كورمەسىنە قاتىستى. كورمەدە تۋروپەراتورلار، اۋە تاسىمالداۋشىلار، قوناق ءۇي برەندتەرى مەن ۇلتتىق تۋريستىك كەڭسەلەردى قامتىعان الەمدىك تۋريستىك سالانىڭ نەگىزگى وكىلدەرى باس قوستى.

كورمە بارىسىندا الماتىنىڭ تۋريستىك الەۋەتى زاماناۋي ديزاين مەن ۇلتتىق ناقىشتى ۇشتاستىرعان ستەند ارقىلى تانىستىرىلدى. ەكسپوزيسيادا قازاقتىڭ ءداستۇرلى مادەني ەلەمەنتتەرى، ۇلتتىق ويۋ-ورنەكتەر جانە زاماناۋي مۋلتيمەديالىق شەشىمدەر ۇيلەسىم تاپتى. كورمە قورىتىندىسى بويىنشا الماتى ستەندى «قالالىق ءتۋريزمدى ۇزدىك تانىستىرعانى ءۇشىن» ماراپاتىنا يە بولدى. بۇل قالانى حالىقارالىق نارىقتا تانىستىرۋ جۇمىسىنىڭ تيىمدىلىگىن جانە شەتەلدىك اۋديتوريانىڭ جوعارى قىزىعۋشىلىعىن كورسەتتى.

OTM Mumbai 2026 اياسىندا الماتى دەلەگاسياسى جەتەكشى تۋروپەراتورلارمەن، اۋە كومپانيالارمەن جانە حالىقارالىق ءقوناقۇي جەلىلەرىمەن 100-دەن استام B2B كەزدەسۋ وتكىزدى. كەلىسسوزدەر شەتەلدەن كەلەتىن تۋريستەر سانىن ارتتىرۋعا، جاڭا تۋريستىك باعىتتار مەن ونىمدەردى دامىتۋعا، سونداي-اق حالىقارالىق ارىپتەستىكتى نىعايتۋعا باعىتتالدى. اسىرەسە، بولاشاعى زور ءۇندى نارىعىنا باسىمدىق بەرىلدى.