ال، ىلە اۋدانىنىڭ اكىمى باسپانالى بولعان جاندارعا تۇرمىستىق تەحنيكا تارتۋ ەتتى، - دەپ حابارلايدى "الماتى" ارناسى.
ايتا كەتەيىك، الەۋمەتتىك ساناتقا جاتاتىن تۇرعىندارعا پاتەر قىزىل كىرپىشتەن تۇرعىزىلعان جاڭا ۇيلەردەن بەرىلدى.
قايىرىمدى كاسىپكەر اۋدانداعى از قامتىلعان جانۇيالارعا جاسالاتىن جاقسىلىق مۇنىمەن بىتپەيدى دەپ وتىر.
سۋ جاڭا پاتەر كىلتىنە يە بولعانداردىڭ ءبىرى - بەس بالانىڭ اناسى ەلميرا كەڭشىلبايەۆا.
كۇيەۋىنىڭ 45 مىڭ تەڭگە جالاقىسى مەن مۇگەدەك بالالارىنا مەملەكەت تاراپىنان بەرىلەتىن 80 مىڭ تەڭگەگە كۇن كورگەن بۇل وتباسى 14 جىلدان بەرى پاتەر جالداپ تۇرعان.
بىردە جەتسە، بىردە جەتپەي اۋپىرىمدەپ كۇن كورگەن ولارعا جانى اشىعان اۋدان اكىمى جومارت كاسىپكەرلەردەن كومەك سۇراعان.
"مۇگەدەك بالام بار. ءبىر پاتەردەن ەكىنشىسىنە كوشىپ جۇردىك. كۇن كورىسىمىز قيىنداپ كەتكەن بولاتىن. كۇنى كەشە عانا پاتەراقىنى 2 اي تولەي الماعاندىقتان، بالالارىمدى الىپ، اكىمگە باردىم. الدىڭعى ەكى اكىمنەن ەش قايىر بولماپ ەدى، جاڭا اكىم كەلە سالىپ، وسىلاي جارىلقاپ جاتىر"، - دەيدى قۋانىشتان كوز جاسىن تىيا الماعان ەلميرا كەڭشىلبايەۆا.
ال، تاعى ەكى بولمەلى پاتەر 9 جىلدان بەرى ءۇي كەزەگىن كۇتىپ جۇرگەن دابىسبايەۆتارعا بۇيىردى.
اۋدان ورتالىعىنان 120 شاقىرىم قاشىقتىقتاعى اقشي اۋىلىندا تۇرىپ كەلگەن مۇمكىندىگى شەكتەۋلى جاندار ەندى بورالداي كەنتىندەگى 48 شارشى مەترلىك پاتەرگە كوشەدى.
"قىزىمىز دا، ايەلىم ەكەۋمىز دە مۇگەدەكپىز. سول ءۇشىن اۋدان ورتالىعى نەمەسە وسى بورالداي كەنتى سياقتى ۇلكەن اۋرۋحاناسى بار جەردەن ءۇي سۇراعانبىز. مىنە، بۇگىن ارمانىمىز ورىندالدى. قۋانىشتىمىز. كوپ راحمەت"، - دەيدى وتاعاسى اداي دابىسايەۆ.
ەكى پاتەردى قانشاعا ساتىپ العانىن جاسىرعان كاسىپكەر جاقسىلىق جاساۋ ءالى دە جالعاسادى دەيدى.
مەملەكەت بيزنەسپەن اينالىسىپ، تابىس تابۋعا مۇمكىندىك بەرگەندىكتەن، حالىققا قايىرىمدىلىق جاساۋ - ءار كاسىپكەردىڭ ازاماتتىق مىندەتى دەيدى ول.
"ىلە اۋدانىنداعى ءبىراز كاسىپكەر كوپ بالالى انالارعا، مۇگەدەك جاندارعا كومەكتەسەيىك دەپ شەشتىك. سەبەبى، ەڭ باستىسى اتا-انا مەن بالا توق بولسا، ەلىمىزدە ءبارى جاقسى بولادى"، - دەيدى قۇرىلىس كومپانياسىنىڭ پرەزيدەنتى امانگەلدى اتايەۆ.
ءوز قاراماعىنداعى تۇرمىسى تومەن وتباسىلارعا كاسىپكەرلەردىڭ كومەكتەسۋىنە مۇرىندىق بولعان اكىم باسپانالى بولعان قوس وتباسىنا تەلەديدار سىيلادى.
جالپى، ىلە اۋدانىندا 11 سانات بويىنشا 3056 ادام ءۇي كەزەگىندە تۇر. پاتەرگە ءزارۋ جانداردىڭ سانىن ازايتۋ ماقساتىندا اۋدان اۋماعىندا 300 پاتەرلى كوپقاباتتى ۇيلەردىڭ قۇرىلىسى باستالماق.
https://www.youtube.com/watch؟v=E_5bEKDegrk
