مەكتەپ تولىعىمەن زاماناۋي جابدىقتارمەن جابدىقتالعان. ءار كابينەتتە ءار ءمۇعالىمنىڭ الدىندا كومپيۋتەر بار. ودان بولەك، جەكە كومپيۋتەر كلاسى، قىزدار مەن ۇل بالالارعا شەبەرحانا جانە زەرتحانا كابينەتتەرى بار.
قوساعاش ورتا مەكتەبىنىڭ قۇرىلىسى 2019 جىلدىڭ ساۋىرىندە باستالىپ، 2020 قىركۇيەگىندە قولدانىسقا بەرىلدى. جوبا قۇنى 700 ملن تەڭگەنى قۇرادى. قاراجات الماتى وبلىستىق بيۋدجەتىنەن ءبولىندى.
- بۇگىن كوپتەن كۇتكەن مەكتەپتىڭ اشىلۋى بولىپ جاتىر. اۋىلىمىزدا جاڭا مەكتەپ بوي كوتەردى. وقۋشىلار مەن اتا-انالاردىڭ قۋانىشىندا شەك جوق. بۇرىنعى مەكتەپتىڭ جاعدايى ناشار بولعان. ەندى مۇعالىمدەر جاڭا كومپيۋتەرلىك سىنىپتا، ينتەراكتيۆتى تاقتامەن ساباق بەرەتىن بولادى، - دەپ اتاپ ءوتتى كوكسۋ اۋىلدىق وكرۋگىنىڭ اكىمى ءاليا باحتياروۆا.
جاڭا مەكتەپ 38 ادامدى جاڭا جۇمىس ورنىمەن قامتيدى. ونىڭ 29-ى - ۇستازدار قاۋىمى. مۇعالىمدەر ۇستازدار كۇنى مەرەكەسى قارساڭىندا بىزگە ۇلكەن سىي بولدى دەپ قۋانۋدا.
ايتا كەتەيىك، ودان بولەك كەربۇلاق اۋدانىندا "جۇمىسپەن قامتۋ جول كارتاسى - 2020" باعدارلاماسى اياسىندا سارىباستاۋ ورتا مەكتەبى جانە "اۋىل – ەل بەسىگى" باعدارلاماسى اياسىندا سارىبۇلاق ورتا مەكتەبى كۇردەلى جوندەۋدەن وتۋدە.
