الماتى وبلىسىندا 8 ناۋرىز – حالىقارالىق ايەلدەر كۇنىنە وراي ءتۇرلى سالادا تابىستى ەڭبەك ەتىپ جۇرگەن نازىك جاندىلارعا قۇرمەت كورسەتىلدى،- دەپ حابارلايدى Dalanews.kz
سالتاناتتى جيىندا ءوڭىر باسشىسى مارات سۇلتانعازييەۆ ەل دامۋىنا ۇلەس قوسىپ جۇرگەن ايەلدەردىڭ قوعامداعى ماڭىزىن اتاپ ءوتتى.
“بۇل كۇن – سىزدەردىڭ مەيىرىمدەرىڭىز بەن اقىل-پاراساتتارىڭىزعا، قاجىرلى ەڭبەكتەرىڭىز بەن قايسارلىقتارىڭىزعا دەگەن ەرەكشە قۇرمەتتىڭ بەلگىسى. سىزدەر – وتباسىنىڭ تىرەگى عانا ەمەس، ەلدىڭ وركەندەۋىنە سۇبەلى ۇلەس قوسىپ جۇرگەن بەلسەندى ماماندارسىزدار. بۇگىندە وبلىستا باسقارۋ سالاسىندا ەڭبەك ەتەتىن ايەلدەردىڭ ۇلەسى – 27 پايىز، ال مەملەكەتتىك قىزمەتتەگى نازىك جاندىلار – 58 پايىزدى قۇرايدى. سونىمەن قاتار، 52 مىڭنان استام كوپبالالى انالارىمىزدىڭ 18 مىڭى «التىن القا» جانە «كۇمىس القا» يەگەرى. انالارىمىز بەن اجەلەرىمىز جاس ۇرپاققا ىزگىلىك پەن ادامگەرشىلىكتىڭ ۇلگىسىن كورسەتىپ، ەڭبەكقورلىق پەن بىلىمگە قۇشتارلىققا تاربيەلەۋدە”، – دەدى وبلىس اكىمى.
مەرەكەلىك جيىندا ءارتۇرلى سالادا ۇزدىك جەتىستىككە جەتكەن ايەلدەر «قۇرمەت» وردەنىمەن، «ەرەن ەڭبەگى ءۇشىن» مەدالىمەن، «شاپاعات» مەدالىمەن، سونداي-اق قازاقستان رەسپۋبليكاسى پرەزيدەنتىنىڭ قۇتتىقتاۋ حاتىمەن، الماتى وبلىسىنىڭ قۇرمەت گراموتاسىمەن جانە العىس حاتىمەن ماراپاتتالدى.
قاراپايىم ەڭبەك – ۇلكەن قۇرمەت ماراپاتتالعانداردىڭ قاتارىندا ەنەرگەتيكا، الەۋمەتتىك قىزمەت، دەنساۋلىق ساقتاۋ، ءبىلىم بەرۋ، ءوندىرىس، سپورت جانە توتەنشە جاعدايلار سالاسىندا ەڭبەك ەتىپ جۇرگەن جاندار بار. ولاردىڭ اراسىندا كىتاپحانا ديرەكتورى، ءورت ءسوندىرۋشى، كيىم فابريكاسىنىڭ تەحنولوگى، ناۋبايشى، ەلەكترومونتەر، ءمۇعالىم جانە جاتتىقتىرۋشى سەكىلدى ءتۇرلى ماماندىق يەلەرى بار.
بۇل قاراپايىم ەڭبەكتىڭ ەلەۋسىز قالمايتىنىن جانە ولاردىڭ ەڭبەگى لايىقتى باعالاناتىنىن بىلدىرەدى. الماتى وبلىسىندا جۇمىسشى ماماندىقتارىن دارىپتەۋ، ەڭبەك ادامىنىڭ مارتەبەسىن كوتەرۋ باعىتىنداعى شارالار الداعى ۋاقىتتا دا جالعاسىن تاپپاق.
