قوعامداعى ءاربىر جاس — ەل بولاشاعىنىڭ ىرگەتاسى. ال سول جاستاردىڭ ىشىندەگى بەلگىلى ءبىر سەبەپتەرمەن وقىمايتىن، جۇمىس ىستەمەيتىن، ءومىردىڭ جولىن تاپپاي جۇرگەن توبى — NEET ساناتى ەرەكشە نازاردى قاجەت ەتەدى. وسى ساناتتاعى جانە جالپى الماتىلىق جاستارعا قولداۋ كورسەتەتىن ماڭىزدى باستامالاردىڭ ءبىرى — كوميۋنيتي ورتالىقتار جەلىسى. الماتى قالاسىندا مۇنداي ورتالىقتار بۇگىندە ءار اۋدان بويىنشا جۇمىس ىستەيدى. Dalanews.kz ءتىلشىسى سولاردىڭ ءبىرى - اۋەزوۆ اۋدانىنىڭ مامىر-1 شاعىن اۋدانىندا ورنالاسقان كوميۋنيتي ورتالىققا باردى.
بۇل ورتالىق 2024 جىلدىڭ 1 قاڭتارىندا اشىلعان. از ۋاقىتتىڭ ىشىندە جاستار ءۇشىن ماڭىزدى ورىنعا اينالىپ ۇلگەردى. مۇندا جاستارعا باعىت-باعدار بەرىلىپ، ولاردى قايتا الەۋمەتتەندىرۋ جانە ومىرلىك داعدىلارعا بەيىمدەۋ جولىندا ءبىرقاتار جۇيەلى جۇمىس جۇرگىزىلۋدە.
بالدىرعان ايشاگۇل، ورتالىقتىڭ باس مامانى:
— ءبىزدىڭ ورتالىقتىڭ نەگىزگى ماقساتى — جاستاردى قولداۋ. اسىرەسە NEET ساناتىنداعى جاستاردى ءبىلىم مەن ەڭبەك نارىعىنا قايتا تارتۋ. ولارعا قىسقا مەرزىمدى كۋرستار، جۇمىسقا ورنالاسۋعا كومەكتەسۋ، تەگىن زاڭگەرلىك جانە پسيحولوگيالىق كەڭەس بەرۋ، شىعارماشىلىق جوبالارىن جۇزەگە اسىرۋعا مۇمكىندىك بەرۋ سياقتى قولداۋلار ۇسىنىلادى.
كوميۋنيتي ورتالىق — بۇل تەك الەۋمەتتىك كومەك ورنى ەمەس، سونىمەن قاتار جاستاردىڭ ءوز قىزىعۋشىلىقتارى مەن قابىلەتتەرىن تانىپ، دامىتا الاتىن كرەاتيۆتى كەڭىستىك. مۇندا تەگىن كوۆوركينگ ايماعى، مۋزىكا جانە بي ستۋدياسى، تەاتر زالى، دىبىس جازۋ بولمەسى، شىعارماشىلىق جوبالارعا ارنالعان الاڭدار بار.
"ءقازىر ورتالىقتا "تازا قازاقستان" باعدارلاماسى اياسىندا ەڭ كوپ جۇمىس اتقارىلىپ جاتىر. ءار سەنبى سايىن جاستارمەن، بەلسەندىلەرمەن بىرگە سەنبىلىكتەرگە شىعامىز. ەكو-اكسيالار، سەمينارلار ۇيىمداستىرىپ ءجۇرمىز. ءقازىر جاز بولعاندىقتان جاستارعا ارنالعان كينو جانە اكۋستيكالىق كەشتەر جاساپ جاتىرمىز"، - دەيدى مامان.
ورتالىققا جاستاردى تارتۋ جولى قانداي؟
كوميۋنيتي ورتالىقتىڭ قىزمەتكەرلەرى جاستاردى تارتۋ ءۇشىن بەلسەندى تۇردە اقپاراتتىق جۇمىستار جۇرگىزۋدە. ولار جوو، كوللەدجدەر مەن مەكتەپتەرگە بارىپ، تىكەلەي تانىستىرۋ جۇمىستارىن ۇيىمداستىرادى. سونىمەن قاتار جاستار ءجيى قولداناتىن الەۋمەتتىك جەلىلەر مەن بۇقارالىق اقپارات قۇرالدارىن ءتيىمدى پايدالانادى. ورتالىقتىڭ قىزمەتتەرى تۋرالى بارلىق اقپارات www.jasalmaty.kz سايتىندا قولجەتىمدى. بۇل پلاتفورما ارقىلى جاستار وزدەرىنە جاقىن ورتالىقتى تاڭداپ، بوس زالداردى قاراپ، قاجەت قىزمەتكە تىركەلە الادى.
"سايت وتە قولجەتىمدى. كەز كەلگەن جاس سايتقا تىركەلىپ، وزىنە قاجەت اۋداندى تاڭدايدى. الماتى بويىنشا 8 اۋداندا دا كوميۋنيتي ورتالىق بار. ءقازىر ءتىپتى ءار اۋداننان ەكى ورتالىقتان اشىلىپ جاتىر. تىركەلۋشى وزىنە قاجەت كوميۋنيتي ورتالىقتى تاڭداعان سوڭ وزىنە قاجەت ءبولىمدى تاڭدايدى. مىسالى، جۇمىس، كۋرس جانە ت.ب. سونداي-اق سايتتا ءار ورتالىقتىڭ زالدارى كورسەتىلگەن. تىركەلۋشى وزىنە قاجەت زالدى تاڭداپ، ونىڭ قاي ۋاقىتتا بوس ەكەنىن كورە الادى جانە ونى تاڭداي الادى. ەگەر سايتپەن جازىلۋ مۇمكىن بولماسا، 24/7 جۇمىس جاساايتىن بايلانىس تەلەفونى دا بار"، - دەپ ءتۇسىندىردى بالدىرعان ايشاگۇل.
ورتالىقتا جۇزەگە اسقان جوبالار مەن باستامالار
جۇسىپبەك ەلەبەكوۆ اتىنداعى رەسپۋبليكالىق ەسترادا جانە سيرك كوللەدجىنىڭ ستۋدەنتتەرى كوميۋنيتي ورتالىق ارقىلى شاعىن تەاتر قويىلىمىن ساحناعا شىعارسا، اباي اتىنداعى قازۇپۋ مەن قازۇۋ ستۋدەنتتەرى اكۋستيكالىق كەش ۇيىمداستىرعان. اشىق اسپان استىنداعى «قۇندىلىق» اتتى ءىس-شارا دا جاستار باستاماسىمەن ءوتتى. بۇل كوميۋنيتي ورتالىقتىڭ جاستار يدەياسىنا قۇلاق ءتۇرىپ، جۇزەگە اسىرۋعا ناقتى قولداۋ بىلدىرەتىنىن كورسەتەتىن بىرنەشە مىسال عانا.
"جاستار شىعارماشىلىق باعىتتاعى كەشتەر مەن جوبالارعا كوبىرەك قىزىعادى. ءبىز جاقىندا عانا قۇمىرا جاساۋ شەبەرحاناسىنا باردىق. جاستارعا قاتتى ۇنادى، ولار ءتىپتى كەشكە دەيىن قالعىسى كەلدى. ءبىزدىڭ ورتالىقتىڭ ءوزى شىعارماشىلىققا بەيىم. ستۋدەنتتەر بىزگە ءوز جوبالارىن اكەلىپ، تانىستىرادى. يدەيالارىن ۇسىنادى. ال ءبىز ولاردى جۇزەگە اسىرۋعا كومەكتەسەمىز، - دەيدى باس مامان. — ءبىز جاستارعا تەك الاڭ ۇسىنىپ قانا قويماي، ولاردىڭ يدەيالارىن شىن مانىندە تىڭدايمىز، قاجەت سەرىكتەستەرمەن بايلانىستىرامىز. بۇل جاستاردىڭ وزىنە دەگەن سەنىمىن وياتادى".
جاستارعا قاجەتتى ەڭ باستى كومەك — قولداۋ مەن تىڭداي ءبىلۋ
كوميۋنيتي ورتالىقتىڭ قىزمەتتەرىنىڭ ىشىندە جاستار ءجيى جۇگىنەتىن باعىتتار — پسيحولوگيالىق جانە زاڭگەرلىك كومەك. سونىمەن قاتار تۇرعىن ءۇي، قارجىلىق كەڭەستەر، "وتباسى بانكىمەن" بىرلەسكەن كونسۋلتاسيالار دا بار. ورتالىق سەرىكتەستىك ورناتقان ۇيىمدار اراسىندا ستوماتولوگيالىق كلينيكالار، كوللەدجدەر، جەكەمەنشىك مەكتەپتەر بار.
جاستار كۇنىنە ارنالعان ەرەكشە كەش
ءقازىر كوميۋنيتي ورتالىق ۇجىمى جاستار كۇنىنە ارنالعان ۇلكەن اكۋستيكالىق كەشكە دايىندالىپ جاتىر. شاراعا جاس ونەرپازداردان باستاپ تانىمال انشىلەرگە دەيىن شاقىرىلماق. بۇل كەش — جاستاردىڭ وزدەرىن كورسەتۋىنە، جاڭا بايلانىستار ورناتۋىنا ۇلكەن مۇمكىندىك بولماق.
پرەزيدەنت سوزىمەن تۇيىندەسەك:
«قازاقستاننىڭ جاستارى — جاسامپاز. ولاردىڭ تىڭ يدەيالارى مەن باستامالارى ەل بولاشاعىنا سەنىمدى نىعايتا تۇسەدى»، — دەگەن قاسىم-جومارت توقايەۆتىڭ ءسوزى كوميۋنيتي ورتالىقتاردىڭ ماڭىزىن ايقىن كورسەتەدى.
بۇگىندە بۇل كەڭىستىكتەر — تەك بوس ۋاقىتتى وتكىزەتىن ورىن ەمەس، شىنايى ومىرلىك وزگەرىس اكەلەتىن، جاستارعا باعىت پەن قولداۋ بەرەتىن جاڭا بۋىن الەۋمەتتىك ينستيتۋتقا اينالىپ كەلەدى.
