1 ناۋرىز بەن 1 ءساۋىر ارالىعىندا الماتىدا «تازا قازاقستان» باعدارلاماسى اياسىندا «الماتى – ءبىزدىڭ ورتاق ءۇيىمىز» اۋقىمدى ناۋقانى وتەدى،- دەپ حابارلايدى Dalanews.kz
ناۋقان ماقساتتارىنىڭ بىرى-ەكولوگيالىق مادەنيەتتى ارتتىرۋ جانە قالا تۇرعىندارى اراسىندا قورشاعان ورتاعا ۇقىپتى قاراۋدى قالىپتاستىرۋ.
ناۋقان ءتورت تاقىرىپتىق اپتا بويىنشا وتەدى، ولار:
- «تازا كوشەلەر» (1-9 ناۋرىز) – ايالدامالاردى، جول بەلگىلەرىن تازارتۋ،قوقىس جاشىكتەرىن ورناتۋ، ماگيسترالداردى اباتتاندىرۋ؛
- «تازا ساياباقتار، سكۆەرلەر مەن تاۋلار» (10-16 ناۋرىز) – تابيعي ايماقتارداعى سەنبىلىكتەر جانە قوقىس جيناۋ جۇمىستارى؛
- «تازا اۋلالار» (17-23 ناۋرىز) – اۋلا اۋماقتارىن، بالالار جانە سپورت الاڭدارىن، اباتتاندىرۋ ەلەمەنتتەرىن جيناۋ جانە سىرلاۋ، كوگالداندىرۋ، «ۇزدىك اۋلا/اۋلا سىپىرۋشى/اۋلا جانىنداعى باۋ-باقشا كونكۋرستارى؛
- «ءبىزدىڭ قالا – ءبىزدىڭ ماقتانىشىمىز» (24 ناۋرىز–1 ءساۋىر) ەسكەرتكىشتەردى اباتتاندىرۋ جانە اعاشتاردى جاپپاي وتىرعىزۋ.
«وتكەن جىلى باستالعان ەكولوگيالىق باستامالاردى جالعاستىرا وتىرىپ، ءبىز بىرگە قالامىزدى تازا ءارى جايلى ەتۋگە تىرىسامىز. 2024 جىلى الماتىدا اباتتاندىرۋدىڭ جاڭا ەرەجەلەرى بەكىتىلدى، ونىڭ اياسىندا 6 مىڭنان استام كاسىپكەرلىك وبەكتىلەرى ءۇشىن اباتتاندىرۋ پاسپورتتارىنىڭ جۇيەسى ەنگىزىلدى. بۇگىنگى تاڭدا 4918 پاسپورت رەسىمدەلدى، بۇل جوسپارلانعاننىڭ 82%-ىن قۇرايدى. پاسپورتتاۋ قاسبەتتەردى، تروتۋارلاردى، جاسىل ايماقتاردى جانە باسقا دا وبەكتىلەردى قوسا العاندا، ىرگەلەس اۋماقتار ءۇشىن جاۋاپكەرشىلىكتى بەكىتۋگە مۇمكىندىك بەرەدى»، – دەدى الماتى اكىمىنىڭ ورىنباسارى بەيبىت شاحانوۆ.
ناۋقان اياسىندا 600-دەن استام زاڭسىز ستاسيونارلىق ەمەس ساۋدا نىساندارىن (سەسن) بولشەكتەۋ، 1 ساۋىرگە دەيىن ۆاندالعا قارسى 12 مىڭ ۋرنا ورناتۋ، 4020-دان استام اۋلانى اباتتاندىرۋ، 445 ساياباق پەن گۇلزاردى، وزەندەر مەن كولدەردىڭ جاعالاۋلارىن تازالاۋ، سونداي-اق 5 مىڭ اعاش پەن بۇتا وتىرعىزۋ جوسپارلانعان.
«قۇرمەتتى تۇرعىندار! «ءالماتى-بىزدىڭ ورتاق ءۇيىمىز»، ال ءاربىر ءۇي تازا ءارى جايلى بولۋ كەرەك. سىزدەردىڭ ءارقايسىلارىڭىزدى قوقىستاردى تازالاۋعا، تابيعاتتى قورعاۋعا جانە تازالىقتى ساقتاۋعا شاقىرامىن. ءبىزدىڭ ناۋقانعا قوسىلىڭىز! ءبىزدىڭ قالا بارلىعىنا ۇلگى بولسىن! الماتىعا دەگەن قامقورلىعىڭىز بەن سۇيىسپەنشىلىگىڭىز ءۇشىن راحمەت!»، – الماتى اكىمىنىڭ ورىنباسارى الىشەر ءابدىقادىروۆ وسىلايشا الماتىلىقتاردى قالانى تازارتۋعا بەلسەندى تۇردە قاتىسۋعا شاقىردى.
