الماتىدا قالانى كوركەيتۋ ءۇشىن 7،5 مىڭ تۇرعىندى كوشىرۋ جانە ولاردىڭ ۇيلەرىن ءسۇرۋ جوسپارى قولعا الىندى. قالالىق ءماسليحات دەپۋتاتتارى بۇل باستامانى ءبىراۋىزدان قولداپ، 2030 جىلعا دەيىن 676 ەسكى ءۇيدى بۇزۋعا شەشىم شىعاردى. اكىمدىك مالىمەتىنشە، كوشىرىلگەن تۇرعىندارعا جاڭا پاتەرلەر بەرىلەدى، دەپ حابارلايدى Dalanews.kz.
ينفورمبيۋرو مالىمەتىنشە، الماتىنىڭ ساۋلەتىنە قاتىستى باعدارلاما 1930-1980 جىلدار ارالىعىندا بوي كوتەرگەن ەكى قاباتتى باسپانالارعا قاتىستى ايتىلعان. وتكەن عاسىردا سالىنىپ، بۇزۋدى قاجەت ەتەتىن عيماراتتار قاتارىندا جەكە تۇرعىن ۇيلەر، ونەركاسىپتىك جانە كوممەرسيالىق نىساندار بار. اكىمدىكتىڭ حابارلاۋىنشا، جەر سىلكىنىسىنە ءتوزىمسىز دەپ تانىلعان ۇيلەردى دە ءسۇرۋ جوسپارلانىپ وتىر.
“بۇزۋعا جىبەرسىن، ءبىراق قولايلى ءۇي بەرسىنشى. وسى جەردەگى ادامدار ريزا بولاتىنداي. جەرگىلىكتى تۇرعىندارعا سول ماڭىزدى. ال اناۋ بەرگەن ۇسىنىستارى، جاعدايلارى ۇنامايدى. ۇسىنىپ جاتقان ۇيلەرى دۇرىس سالىنباعان دەيدى”، – دەيدى الماتى قالاسىنىڭ تۇرعىنى داۋرەن قۋانىشوۆ ينفورمبيۋروعا بەرگەن سۇقباتىندا.
“ايىرباستاۋعا بەرگەن ۇيلەر قالانىڭ سىرتىندا، ال ساتىپ الۋعا بەرگىسى كەلىپ وتىرعان سوماسى نارىقتاعى باعادان ايتارلىقتاي تومەن. سوندىقتان ازىرگە كەلىسىمگە كەلە الماي وتىرمىز”، – دەدى تۇرعىن سۆەتلانا وبرازسوۆا.
اكىمدىك قىزمەتكەرلەرىنىڭ سوزىنشە، قازىرگى ۋاقىتتا ۇسىنىستىڭ ءبىرىن قابىلداپ ەسكى باسپانانى بوساتىپ جاتقاندار بار. ال قارسىلىق تانىتقان مۇلىك يەلەرى جوباعا تارتىلعان ينۆەستورلاردىڭ وزىمەن كەلىسىپ، شەشىمگە كەلسە بولادى دەيدى.
“باعدارلامانىڭ بۇعان دەيىنگى 2021-2025 جىلعا ارنالعان جوسپارى اياسىندا جۇمىس جۇرگىزىلىپ جاتىر. جاڭا وزگەرىستەر ەندى ءبىزدىڭ وكىلەتىمىزدى ارتتىرىپ وتىر. جوبا تەك ەسكى ۇيلەرگە عانا ەمەس، جەكەمەنشىك سەكتورلارعا دا قاتىستى. نەگىزى جالپى 1300-دەن استام ءۇيدى جاڭارتۋ كوزدەلگەن”، – دەدى "الماتى قالاسى اكىمدىگىنىڭ كۇردەلى قۇرىلىس كاسىپورنى" ج ش س رەنوۆاسيا دەپارتامەنتىنىڭ ديرەكتورى جاسۇلان شايكەنوۆ.
قالا بيلىگىنىڭ حابارلاۋىنشا، قازىرگى ۋاقىتتا الماتىدا 1366 توزىعى جەتكەن سەيسميكالىق ءقاۋىپتى ءۇي بار. وندا جالپى 43 مىڭنان استام تۇرعىن ءومىر سۇرەدى. ەسكى باسپانانىڭ كوبى تۇركسىب اۋدانىندا ورنالاسقان. جالپى سانى 580-نەن اسادى. سول سەبەپتى باعدارلامانى ىسكە اسىرۋدا باسىمدىق ءدال وسى ايماققا بەرىلەدى ەكەن.
