Almatyda qalany kórkeitý úshin 7,5 myń turǵyndy kóshirý jáne olardyń úilerin súrý jospary qolǵa alyndy. Qalalyq máslihat depýtattary bul bastamany biraýyzdan qoldap, 2030 jylǵa deiin 676 eski úidi buzýǵa sheshim shyǵardy. Ákimdik málimetinshe, kóshirilgen turǵyndarǵa jańa páterler beriledi, dep habarlaidy Dalanews.kz.
Informbiýro málimetinshe, Almatynyń sáýletine qatysty baǵdarlama 1930-1980 jyldar aralyǵynda boi kótergen eki qabatty baspanalarǵa qatysty aitylǵan. Ótken ǵasyrda salynyp, buzýdy qajet etetin ǵimarattar qatarynda jeke turǵyn úiler, ónerkásiptik jáne kommertsiialyq nysandar bar. Ákimdiktiń habarlaýynsha, jer silkinisine tózimsiz dep tanylǵan úilerdi de súrý josparlanyp otyr.
“Buzýǵa jibersin, biraq qolaily úi bersinshi. Osy jerdegi adamdar riza bolatyndai. Jergilikti turǵyndarǵa sol mańyzdy. Al anaý bergen usynystary, jaǵdailary unamaidy. Usynyp jatqan úileri durys salynbaǵan deidi”, – deidi Almaty qalasynyń turǵyny Dáýren Qýanyshov Informbiýroǵa bergen suqbatynda.
“Aiyrbastaýǵa bergen úiler qalanyń syrtynda, al satyp alýǵa bergisi kelip otyrǵan somasy naryqtaǵy baǵadan aitarlyqtai tómen. Sondyqtan ázirge kelisimge kele almai otyrmyz”, – dedi turǵyn Svetlana Obraztsova.
Ákimdik qyzmetkerleriniń sózinshe, qazirgi ýaqytta usynystyń birin qabyldap eski baspanany bosatyp jatqandar bar. Al qarsylyq tanytqan múlik ieleri jobaǵa tartylǵan investorlardyń ózimen kelisip, sheshimge kelse bolady deidi.
“Baǵdarlamanyń buǵan deiingi 2021-2025 jylǵa arnalǵan jospary aiasynda jumys júrgizilip jatyr. Jańa ózgerister endi bizdiń ókiletimizdi arttyryp otyr. Joba tek eski úilerge ǵana emes, jekemenshik sektorlarǵa da qatysty. Negizi jalpy 1300-den astam úidi jańartý kózdelgen”, – dedi "Almaty qalasy ákimdiginiń kúrdeli qurylys kásiporny" JShS renovatsiia departamentiniń direktory Jasulan Sháikenov.
Qala biliginiń habarlaýynsha, qazirgi ýaqytta Almatyda 1366 tozyǵy jetken seismikalyq qaýipti úi bar. Onda jalpy 43 myńnan astam turǵyn ómir súredi. Eski baspananyń kóbi Túrksib aýdanynda ornalasqan. Jalpy sany 580-nen asady. Sol sebepti baǵdarlamany iske asyrýda basymdyq dál osy aimaqqa beriledi eken.
