مەملەكەت باسشىسى قاسىم-جومارت توقايەۆ اقش سەناتورى ستيۆ دەينسپەن كەزدەسۋىندە رەسەيدەگى كەيىنگى جاعدايعا قاتىستى قازاقستاننىڭ ۇستانىمىن ايتتى، - دەپ حابارلايدى Dalanews.kz.
پرەزيدەنت قاسىم-جومارت توقايەۆ حالىقارالىق جانە وڭىرلىك قاۋىپسىزدىك ماسەلەسىنە باسا ءمان بەردى.
"بۇل رەتتە پرەزيدەنت ماسكەۋ وبلىسىنداعى لاڭكەستىك ارەكەتتى قازاقستان الەمدە العاشقىلاردىڭ ءبىرى بولىپ قاتاڭ ايىپتاعانىن جانە وسىنداي قيىن-قىستاۋ كەزەڭدە رەسەيمەن بىرگە ەكەنىن ايتتى"، - دەپ جازىلعان اقوردا مالىمەتىندە.
ايتا كەتەيىك، اتىس "پيكنيك" روك-توبىنىڭ كونسەرتىنە بىرنەشە مينۋت قالعاندا باستالعان بولاتىن.
"زالدا جۇرگەن ادامدار اتىستان قورعانۋ ءۇشىن بىردەن جەرگە جاتىپ قورعاندى. كەمىندە 15-20 مينۋت جەردە جاتىپ، اقىرىنداپ سىرتقا شىعا باستادى. كوبى قاشىپ ۇلگەردى"، - دەپ جازدى سول كەزدە رەسەيلىك ارنالار.
ال بۇعان دەيىن ماسكەۋ قالاسىنىڭ اۋداندىق سوتىنا كروكۋس-ەكسپو ساۋدا ويىن-ساۋىق ورتالىعىندا اۋقىمدى تەرروريستىك اكت جاسادى دەگەن كۇدىكتىلەر اكەلىنگەن بولاتىن. كەيىنىرەك باسمان اۋداندىق سوتى تەرروريستەر توبىنا قاتىستى الدىن الا تەرگەۋ ورگاندارىنىڭ بۇلتارتپاۋ شاراسىن تاڭداۋ تۋرالى ءوتىنىشىن قاراۋعا كىرىستى.
رەسەيدىڭ توتەنشە جاعدايلار مينيسترلىگىنىڭ الدىن الا اقپاراتى بويىنشا تەرروريستەردىڭ اتىس قارۋىن قولدانۋى مەن ساۋدا ويىن-ساۋىق ورتالىعى ورتەنۋىنەن 130-دان اسا ادام قازا تاپقان، زارداپ شەككەندەردىڭ سانى 180 ادامنان اسادى.
سوت بۇعان دەيىن ۇستالعان كۇدىكتىلەرگە 1 اي 28 تاۋلىك مەرزىمگە، ياعني 2024 جىلعى 22 مامىرعا دەيىن قاماۋعا الۋ تۇرىندەگى بۇلتارتپاۋ شاراسىن تاڭدادى.
